गोंदिया दि:20 :– महात्मा ज्योतीबा फुले संशोधन व प्रशिक्षण संस्था (महाज्योती), नागपूर या संस्थेमार्फत इतर मागास वर्ग विमुक्त जाती भटक्या जमाती व विशेष मागास प्रवर्गातील विद्यार्थ्यांसाठी पोलीस – मिलिटरी भरती पूर्व प्रशिक्षण राबविण्यात येते. त्याकरिता विद्यार्थ्यांची नोंदणी प्रक्रिया सुरु करण्यात आलेली आहे.
सदर प्रशिक्षण हे महाज्योतीमार्फत नागपूर व औरंगाबाद या दोन ठिकाणी देण्यात येणार आहे. प्रशिक्षणाचा कालावधी चार महिन्याकरिता असून प्रशिक्षण हे अनिवासी स्वरुपाचे आहे. सहभागी होणाऱ्या विद्यार्थ्यांना दरमाह सहा हजार रुपये इतके विद्यावेतन देण्यात येणार आहे. तसेच प्रशिक्षण दरम्यान पुस्तके, गणवेश व बुट देखील देण्यात येणार आहे.
सदर प्रशिक्षणाचा लाभ घेण्यासाठी उमेदवार हा इतर मागास वर्ग विमुक्त जाती – भटक्या जमाती व विशेष मागास प्रवर्गापैकी असावा तसेच तो नॉनक्रिमिलेअर गटातील असावा. उमेदवार किमान 12 वी उत्तीर्ण असावा. इच्छुक उमेदवाराने महाज्योतीच्या www.mahajyoti.org.in या संकेत स्थळावरील नोटीस बोर्डमधील पोलीस भरती पूर्व प्रशिक्षण या टॅबवर जाऊन ऑनलाईन पध्दतीने अर्ज करावा. अर्ज करण्याची अंतीम तारीख 25 जानेवारी 2023 ही आहे. तरी महाराष्ट्रातील इतर मागास वर्ग विमुक्त जाती – भटक्या जमाती व विशेष मागास प्रवर्गातील विद्यार्थ्यांना पोलीस – सैनिक भरती पूर्व प्रशिक्षणाकरिता अर्ज करण्याचे आवाहन व्यवस्थापकीय संचालक महात्मा ज्योतीबा फुले संशोधन व प्रशिक्षण संस्था नागपूर (महाज्योती) राजेश खवले यांनी केले आहे.
