गोंदिया, दि.27 : मधमाशा वनस्पतींच्या परागीकरणात महत्वाची भूमिका बजावतात, त्यामुळे पिकांच्या उत्पादनात वाढ होते. मधाचे आयुर्वेदिकदृष्ट्या अनेक फायदे आहेत, त्यामुळे मधमाशीपालन काळाची गरज आहे.
राज्यात राष्ट्रीय मधुमक्षिकापालन व मध अभियान ही केंद्र पुरस्कृत योजना राबविण्यात येत आहे. त्यानुसार महाराष्ट्र राज्य फलोत्पादन आणि औषधी वनस्पती मंडळ, पुणे यांना राष्ट्रीय मधुमक्षिका पालन व मध अभियान राबविणारी राज्यस्तरीय अंमलबजावणी यंत्रणा म्हणून केंद्र शासनाने मान्यता दिली आहे. सदर अभियानांतर्गत लघु अभियान-1, लघु अभियान-2 व लघु अभियान-3 समाविष्ट असून यामध्ये विविध उपक्रम राबविले जाणार आहेत.
कृषि आणि शेतकरी कल्याण मंत्रालयाद्वारे राष्ट्रीय मधुमक्षिका मंडळ, नवी दिल्ली अंतर्गत मध आणि मधमाशी संबंधित अन्य उत्पादनांच्या योग्य स्त्रोताचा शोध घेण्याच्या दृष्टीने व अद्ययावत नोंदी ठेवण्यासासाठी मधुक्रांती पोर्टल हे ऑनलाईन पोर्टल विकसित केलेले आहे. या पोर्टलवर मधुमक्षिकापालकांनी नोंदणी करावयाची आहे.
मधुक्रांती पोर्टलवरील नोंदणीमुळे मधुमक्षिकापालकांना पुढील प्रमाणे लाभ मिळत आहे. मधुमक्षिकापालकाला नोंदणीकृत/मान्यता प्राप्त मधुमक्षिकापालक म्हणून ओळख मिळते. नोंदणी धारकांना 1 लाखापर्यंत फ्री विमा उपलब्ध होतो. विना अडथळा मधुमक्षिका पेट्यांचे स्थलांतर.
नोंदणीवेळी आवश्यक कागदपत्रे : आधारकार्ड, अद्ययावत भ्रमणध्वनी क्रमांक (आधार क्रमांकाशी जोडलेला), मधुमक्षिका पालनासंबंधित तपशील, मधुमक्षिकापालन प्रशिक्षण प्रमाणपत्राची सॉफ्ट प्रत, मधुमक्षिकापालकाचा मधुमक्षिका पेट्यांसमवेत फोटो. नोंदणी शुल्क फक्त ऑनलाईन पध्दतीने अदा करता येते.
तरी जिल्ह्यातील जास्तीत जास्त मधुमक्षिकापालकांनी मधुक्रांती पोर्टलवर नोंदणी करावी, असे आवाहन जिल्हा अधीक्षक कृषि अधिकारी निलेश कानवडे यांनी केले आहे. अधिक माहितीसाठी राष्ट्रीय मधमाशी मंडळ नवी दिल्ली- (011) 23325265,23719025. मधुक्रांती पोर्टल-टेक सपोर्ट- 18001025026, महाराष्ट्र राज्य फलोत्पादन व औषधी वनस्पती मंडळ पुणे- (020) 29703228, जिल्हा अधीक्षक कृषि अधिकारी गोंदिया (07182) 230373 यावर संपर्क साधावा.
