**आरोग्य सुविधांचा विस्तार,नव्या रुग्णालयांचे लोकार्पण व भूमिपूजन
धाराशिव दि.१९– जिल्ह्यात आरोग्य सेवा बळकटीकरणाच्या दिशेने पाऊल उचलण्यात येत असून,विविध आरोग्य संस्थांचे लोकार्पण व भूमिपूजन पालकमंत्री प्रतापराव सरनाईक यांच्या हस्ते २० फेब्रुवारी रोजी होणार आहे.या अंतर्गत उपजिल्हा रुग्णालये,ग्रामीण रुग्णालये,सार्वजनिक आरोग्य युनिट्स आणि जिल्हा औषध भांडार यांसह आरोग्य यंत्रणेच्या विस्तारास चालना मिळणार आहे.
नळदुर्गच्या ५० खाटांचे उपजिल्हा रुग्णालय हे २१ कोटी ८२ लक्ष रुपये खर्च करून पूर्णत्वास आले आहे.या प्रकल्पात अत्याधुनिक सुविधा पुरवण्यात आल्या आहेत.यामध्ये सुसज्ज मुख्य इमारत,बाह्य व आंतररुग्ण विभाग,प्रसूती गृह,शस्त्रक्रिया विभाग,ऑक्सिजन पुरवठा विभाग, शवविच्छेदन विभाग,औषध भांडारगृह व नातेवाईकांसाठी धर्मशाळेचा समावेश आहे.
बेंबळी येथील ३० खाटांचे ग्रामीण रुग्णालय हे ४ कोटी ५० लाख रुपये खर्च करून तयार झाले आहे.या रुग्णालयात अत्याधुनिक वैद्यकीय सुविधा देण्यात आल्या असून,प्रसूती गृह,शस्त्रक्रिया विभाग व दिव्यांगांसाठी विशेष सोयींचा समावेश आहे.
ब्लॉक पब्लिक हेल्थ युनिट इमारतींचे बांधकाम प्रत्येकी ५० लाख रुपये खर्च करून करण्यात आले आहे.यामध्ये परंडा,उमरगा,तुळजापूर,कळंब,वाशी व लोहारा येथील ईमारतीचा समावेश आहे.या इमारतींमध्ये सेंट्रल प्रयोगशाळा,एम.आय. एस.कक्ष व तालुका आरोग्य कार्यालय राहणार आहे.जिल्हा प्रशिक्षण संघ व औषध भांडारगृह बांधकामाचे भूमिपूजन करण्यात येणार आहे.जिल्हा प्रशिक्षण संघ इमारतीचे बांधकाम ४ कोटी ८१ लाख रुपये खर्च करून करण्यात येणार आहे.या इमारतीचे भूमिपूजन करण्यात येणार आहे.१०० व्यक्तींना प्रशिक्षण देण्याची क्षमता येथे राहणार आहे.जिल्हा औषध भांडारगृहाचे देखील भूमिपूजन करण्यात येणार आहे.या बांधकामावर ३ कोटी १६ लाख रुपये खर्च करण्यात येणार आहे.
बांधण्यात येणारी ही स्वतंत्र इमारत औषध साठवण व वितरणासाठी राहणार आहे.या महत्त्वपूर्ण प्रकल्पांमुळे जिल्ह्यातील आरोग्य व्यवस्था अधिक सक्षम होईल. ग्रामीण भागात आरोग्य सेवा सुलभ होणार असून,नागरिकांना दर्जेदार वैद्यकीय सुविधा मिळण्यास मदत होणार आहे.
