गोंदिया,दि.23ः- गोंदिया जिल्हा परिषदेच्या विषय समिती सभापतीपदासाठी आज 23 मे रोजी झालेल्या निवडणुकीसाठी भारतीय जनता पक्षाने अर्जुनी मोरगाव विधानसभा मतदारसंघाला पुर्णत बाजुला सारल्याचे चित्र समोर आले आहे.वास्तविक तिरोडा-गोरेगाव व गोंदिया मतदारसंघानंतर याच मतदारसंघातून भाजपला सर्वाधिक जागा निवडणूकीत जिंकता आल्या.याउलट आमगाव-देवरी मतदारसंघात मोजक्या जागेवर समाधान मानावे लागलेले असताना जिल्हाध्यक्ष व संघटनमंत्र्यांनी आपला मतदारसंघ म्हणून अर्जुनी मोरगाव मतदारसंघाला वाटाण्याच्या अक्षता दाखवल्याची चर्चा भाजपच्या कार्यकर्त्यांमध्ये दबक्या आवाजात सुरु झाली आहे.त्यातच सलग दोनवेळा वेगवेगळे मतदारसंघ बदलून निवडणुक जिंकून पक्षाची ताकद कायम ठेवणार्या माजी जिल्हा परिषद उपाध्यक्ष रचनाताई गहाणे व तिरोडा तालुक्यातील रजनीताई कुंभरे हे वास्तविक सभापतीपदासाठी प्रबळ दावेदार असताना त्यांना वगळण्यात आल्याने पक्षातील या भूमिकेबद्दलही नाराजी दिसून येत आहे.देवरी आमगाव मतदारसंघातून सविता पुराम या पुराड़ा मतदारसंघातून सर्वाधिक मतानी जरी निवडून आल्या असल्या तरी मागच्या पंचवार्षिक निवडणुकीत त्या सभापती राहिल्यानंतर आणि त्यांचे पती हे आमदार असतानाही जिल्हा परिषदेची निवडणुक दुसर्या मतदारसंघात जाऊन पराभूत झाल्या होत्या.त्यानंतर यावेळी त्यांनी आपल्या स्वगृह असलेल्या पुराडा मतदारसंघातून निवडणुक लढविली मात्र काँग्रेसच्या उमेदवाराचा अर्ज बाद झाल्याने आणि काँग्रेसने राष्ट्रवादी काँग्रेसला सहकार्य न केल्यामुळे या जागेवर भाजपला लाभ होऊन श्रीमती पुराम या निवडून आल्या.मात्र गेल्या निवडणुकीत आपले गाव सोडून गोठणगाव येथून निवडणुक जिंकणार्या रचनाताई गहाणे यांनी यावेळी आरक्षण बदलामुळे नवेगावबांध मतदारसंघातून निवडणुक लढविली आणि त्यात विजयी झाल्या.वास्तविक त्यांच्या अडीच वर्षाच्या कार्यकाळात पक्षाच्या कार्यकर्त्यांचा विचार करत आपला कार्यकाळा काढला होता.त्यांच्या दबंगभुमिकेमुळे प्रशासनावरही वचक होता,त्यांना वास्तविक संधी पक्षाने देण्याचा विचार करायला हवा होता.त्याचप्रमाणे तिरोडा तालुक्यातील रजनीताई कुंभरे यांनी सुध्दा मतदारसंघ बदलून विजय मिळविलेला आहे.आपला पारंपारिक मतदारसंघातून विजय मिळवून पद मिळवणे आणि सलग दोनदा मतदारसंघ बदलून विजय मिळविण्यासाठी एक परिपक्वता जी राजकारणात असायला हवी असे दोन उमेदवार भाजपकडे असताना त्यांना डावलणे पक्षाला भविष्यात घातक ठरू शकते.तर आमगाव पंचायत समितीचे माजी सभापती हनवंत वट्टी हे सुध्दा एक चांगले उमेदवार यावेळी पक्षाला सभापतीपदासाठीच नव्हे तर नवा व फ्रेश चेहरा विधानसभेसाठी मिळाला असता मात्र भाजप या मतदारसंघात नव्या चेहर्यांना फक्त कार्यकर्तेच ठेवण्याच्या तयारीत असल्यानेच सभापतीपदच काय तर आमदारकीच्या उमेदवारीसाठीही रांगेत येऊ द्यायला तयार नाही की काय असे चित्र जिल्हा परिषदेच्या आज झालेल्या विषय समितीच्या सभापती निवडणुकीवरुन दिसून आले.
