महाविकास आघाडीची मुंबईत तब्बल ९ तास खलबतं;
मुंबई:-गेल्या अनेक दिवसांपासून जागावाटपाचा तिढा काही सुटताना दिसत नव्हता. अखेर महाविकास आघाडीची सर्व जागांवर चर्चा पूर्ण झाल्याची माहिती समोर आली आहे. मुंबईमधील ट्रायडंट हॉटेल येथे महाविकास आघाडीमधील नेत्यांची बैठक होती. शनिवारी दुपारी ४ वाजल्यापासून सुरू झालेली बैठक रात्री एक वाजता संपली. काही जागांवरून असलेला तिढा आता सुटलेला दिसत आहे. बैठकीनंतर महाविकास आघाडीच्या नेत्यांनी याबाबत माहिती दिली. त्यामुळे महाविकास आघाडीकडून जागावाटपाची यादी जाहीर केली जाऊ शकते.
महाविकास आघाडीमध्ये काही जागांवरून तिढा पाहायला मिळत होता. ठाकरे गट आणि काँग्रेसमध्ये विदर्भातील रामटेक, कामठी, द. नागपूर आणि भंडारा या चार जागांवरून वाद पाहायला मिळाला होता. काँग्रेस प्रदेशाध्यक्ष नानापट पटोले आणि ठाकरे गटाचे नेते संजय राऊत यांच्यामध्ये खटके उडाल्याच्या बातम्या समोर आल्या होत्या. या वादावर बोलताना उद्धव ठाकरेंनी तुटेपर्यंत ताणू नका असं म्हटलं होतं. त्यानंतर काँग्रेसचे प्रभारी रमेश चेन्नीथला यांनी मातोश्रीवर जात उद्धव ठाकरेंची भेट घेतली, त्यानंतर ट्रायडंट हॉटेलमध्ये बैठक होणार असल्याची माहिती दिली होती.
महाविकास आघाडीच्या जागावाटपामध्ये काँग्रेस आणि ठाकरे गटाला १०० पेक्षा जास्ता जागा असल्याची महिती आहे. ट्रायडंट हॉटेलमध्ये शिवसेना ठाकरे गटाचे नेते संजय राऊत, काँग्रेस नेते बाळासाहेब थोरात, शरद पवार गटाचे जयंत पाटील यांच्यासह अनेक नेते उपस्थित होते. महाविकास आघाडीकडून संयुक्त पत्रकार परिषदेत घेत महाविकास आघाडीची यादी आज किंवा उद्या जाहीर करण्यात येईल, अशी माहिती बैठकीनंतर नेत्यांनी दिली. तब्बल नऊ तास चाललेल्या बैठकीनंतर महाविकास आघाडीने आपला जाागावाटपाटा तिढा सोडवला आहे. दरम्यान, काँग्रेसचे प्रदेशाध्यक्ष नाना पटोले, गटनेते बाळासाहेब थोरात आणि विरोधी पक्षनेते विजय वडेट्टीवार दिल्लीला जाणार आहेत. स्क्रिनिंग कमिटीच्या बैठकीला हे नेते हजेरी लावणार आहेत. महाविकास आघाडीच्या १०० उमेदवारांची घोषणा होण्याची शक्यता आहे. शरद पवार गटाचे ५८ उमेदवार निश्चित झाल्याची माहिती मिळत आहे.
