जयपूर,(वृत्तसंस्था)- शिक्षकाने मारल्याने एका विद्यार्थ्याने गळफास घेऊन आत्महत्या केली आहे. शिक्षकाला अटक करण्यात आली आहे, अशी माहिती पोलिसांनी आज (सोमवार) दिली.
पोलिस सूत्रानुसार, बन्थुनी गावात असलेल्या सरकारी शाळेत दिलकुश सहारिया हा दहावीच्या वर्गात शिकत होता. अभ्यास न केल्यामुळे शिक्षक मुकुट बिहारी सेन यांनी दिलकुशला वर्गात मारहाण केली होती. शिक्षकाने विद्यार्थ्यांसमोर मारल्यामुळे तो नाराज झाला होता. घरी गेल्यानंतर त्याने चिठ्ठी लिहून आत्महत्या केली. शिक्षकाला अटक करण्यात आली असून, आज न्यायालयापुढे हजर करण्यात आले होते. न्यायालयाने पोलिस कोठडी सुनावली आहे.
दरम्यान, जिल्ह्यात शिक्षकाने मारहाण केल्यामुळे दोन विद्यार्थ्यांनी आत्महत्या केल्याची घटना महिन्यात घडली आहे. काही दिवसांपूर्वीच 12 वर्षाच्या विद्यार्थ्याने आत्महत्या केली होती.
