मुंबई- पत्राचाळ घोटाळा प्रकरणात ठाकरे गटाचे नेते संजय राऊत यांना जामीन मंजूर झाला आहे. पीएमएलए न्यायालयाकडून त्यांना मोठा दिलासा मिळाला आहे. तसेच, या प्रकरणात प्रविण राऊत यांनाही न्यायालयाने जामीन मंजूर केला आहे.
ईडीची मागणी फेटाळली
संजय राऊत यांना जामीन मिळताच या निर्णयाला स्थगिती द्यावी, अशी मागणी ईडीने पीएमएलए न्यायालयाला केली. ईडीच्या अर्जावर दुपारी तीन वाजता न्यायालयात सुनावणी झाली. सुनावणीत ईडीची ही मागणी पीएमएलए कोर्टाने फेटाळून लावली. त्यामुळे संजय राऊत यांच्या सुटकेचा मार्ग मोकळा झाला आहे.
ठाकरे गटाचा जल्लोष
गेल्या 100 दिवसांपासून संजय राऊत कोठडीत आहेत. आज त्यांना जामीन मंजूर झाल्याने ठाकरे गटाने जल्लोष केला आहे. उद्धव ठाकरेंच्या शिवसेनेची तोफ बाहेर येऊन पुन्हा धडाडणार, अशी प्रतिक्रिया ठाकरे गटाच्या नेत्यांनी दिली आहे. ‘टायगर इज बॅक’, अशी प्रतिक्रिया ठाकरे गटाच्या नेत्या सुषमा अंधारे यांनी दिली आहे.
न्यायालयीन कोठडीत दोनदा वाढ
गोरेगावच्या कथित पत्राचाळ घोटाळा प्रकरणी ईडीने 31 जुलै रोजी राऊत यांना अटक केली होती. सुरुवातीला पोलिस कोठडी व त्यानंतर दोनदा संजय राऊत यांच्या न्यायालयीन कोठडीत वाढ झाली होती. त्यामुळे आज राऊत यांना जामीन मिळण्याची शक्यता होती. त्यानुसार अखेर राऊत यांना जामीन मिळाला.
बाहेर कधी येणार?
दरम्यान, संजय राऊत यांच्या जामिनाला ईडी आता उच्च न्यायालयात आव्हान देणार आहे. दुसरीकडे, संजय राऊत यांना जामीन मिळाला असला तरी आज संध्याकाळपर्यंत न्यायालयाच्या निकालाची प्रत तुरुंग प्रशासनाला उपलब्ध होणार आहे. त्यानंतर राऊत यांना तुरुंगाबाहेर काढण्याची प्रक्रिया सुरु होईल.
नेमके प्रकरण काय?
गोरेगावमध्ये गुरू आशिष कंपनीला चाळीच्या पुनर्विकासाचे काम देण्यात आले होते. यावेळी प्रवीण राऊत यांनी या जागेतील एफएसआय परस्पर विकल्याचे समोर आले आहे. गोरेगाव पश्चिमेतील सिद्धार्थनगर भागातील झोपडपट्टीचे काम न करताच परस्पर इथला एफएसआय बेकायदेशीररित्या विकण्यात आला. जवळपास 1 हजार कोटी रुपयांचा हा व्यवहार होता. संजय राऊतच या व्यवहाराचे मास्टरमाईंड होते, असा आरोप ईडीने संजय राऊत व प्रविण राऊत यांच्यावर केला आहे.
अटींसह जामीन
संजय राऊत यांना दोन लाख रुपयांच्या जातमुचलक्यावर पीएमएलए कोर्टाने जामीन मंजूर केला आहे. संजय राऊत यांचे बंधू सुनील राऊत हे दोन लाख रुपये भरण्यासाठी पीएमएलए कोर्टात हजर झाले आहेत. तसेच, कोर्टाने काही अटींवर संजय राऊतांना जामीन मंजूर केला आहे. चौकशीला बोलावले जाईल तेव्हा हजर रहावे, ही त्यातील प्रमुख अट आहे.
राऊत डरपोक नाहीत- आदित्य ठाकरे
संजय राऊतांना जामीन मंजूर झाला. आम्ही सर्व शिवसेना कुटुंबाकडून त्यांचे स्वागत करतो, अशी प्रतिक्रिया आदित्य ठाकरे यांनी दिली आहे. आदित्य ठाकरे म्हणाले, संजय राऊत डरपोक नाहीत. त्यांच्यावर प्रचंड दबाव टाकला गेला, तरीही त्यांनी गद्दारी केली नाही. त्यांचा आवाज दाबण्याचा प्रयत्न झाला. तरीही ते घाबरले नाहीत. आज राजकीय नेत्यांवर कारवाई होत आहे, उद्या सत्याचा आवाज दाबण्यासाठी पत्रकारांवरही कारवाई होऊ शकते.
रोहित पवारांचा खतरनाक VIDEO
संजय राऊत यांना जामीन मिळाल्यानंतर राष्ट्रवादी काँग्रेसचे नेते आमदार रोहित पवार यांनी एक खतरनाक व्हिडीओ ट्विट केलाय. त्याला फक्त सत्य मेव जयते! हे एकच जोडून प्रतिक्रिया दिलीय.
सुषमा अंधारेंचे डोळे पाणावले
संजय राऊत यांना जामीन मिळाल्यानंतर प्रतिक्रिया व्यक्त करताना सुषमा अंधारेंचे डोळे पाणावले. संजय राऊत यांच्या जामिनामुळे आम्हाला हजार हत्तीचे बळ मिळाले. आम्ही अत्यंत आनंदी आहोत, असे म्हणताना सुषमा अंधारे भावूक झाल्या.
