7 ऑक्टोबर 2021 मध्ये अजित पवारांच्या विविध मालमत्तेवर आयकर विभागाने छापा टाकून संपत्ती केली होती जप्त
मुंबई :-महाराष्ट्राचे उपमुख्यमंत्री अजित पवार यांना मोठा दिलासा मिळाला आहे.उपमुख्यमंत्रीपदाची शपथ घेतल्यानंतर दुसऱ्याच दिवशी त्यांना आयकर विभागाकडून गुडन्यूज मिळाली आहे. आयकर विभागाने अजित पवारांची जप्त केलेली संपत्ती रिलीज केली आहे.दिल्लीतील बेनामी ट्रिब्युनलने याबाबतचे आदेश जारी केले आहेत.अजित पवार यांचे सुपुत्र पार्थ पवार आणि पत्नी सुनेत्रा पवार यांची संपत्ति इनकम टॅक्स विभागाने जप्त केली होती.
आता न्यायालयाच्या आदेशानुसार जप्त केलेली संपत्ती मुक्त करण्यात आली आहे. लवकरच जप्त केलेली संपत्ती अजित पवार यांच्या कुटुंबीयांकडे सुपूर्द केली जाईल. दरम्यान, 7 ऑक्टोबर 2021 मध्ये अजित पवारांच्या विविध मालमत्तेवर आयकर विभागाने छापा टाकून संपत्ती जप्त केली होती.
बेनामी मालमत्ता प्रकरणात न्यायाधिकरणाकडून अजित पवारांना दिलासा मिळाला आहे. 2021 मध्ये झालेल्या बेनामी संपत्ती प्रकरणात जप्त केलेल्या मालमत्तेची सुटका करण्यात आली आहे. दिल्लीतील बेनामी मालमत्ता व्यवहार प्रतिबंधक अपीलीय न्यायाधिकरणाच्या आदेशानंतर आयकर विभागाने ही कारवाई केली. न्यायाधिकरणाने त्याच्या आणि त्याच्या कुटुंबाविरुद्ध बेनामी मालमत्तेच्या मालकीचे आरोप फेटाळून लावले.
अजित पवार यांच्या ३० पैकी जास्त मालमत्ता जप्त करण्यात आल्या होत्या. यात ४०० कोटींपेक्षा जास्त किंमतीचा जरंडेश्वर साखर कारखाना, दिल्लीतील २० कोटींचा फ्लॅट, पार्थ पवार यांचं २५ कोटींचं निर्मल ऑफिस, गोल्यातील २५० कोटी रुपयांचं निलय रिसॉर्ट याशिवाय पुणे, मुंबईसह महाराष्ट्रातील २७ वेगवेगळ्या ठिकाणची जमीन यांचा समावेश होता.
महाराष्ट्राचे मुख्यमंत्री म्हणून देवेंद्र फडणवीस यांनी दोन दिवसांपूर्वीच शपथ घेतली. त्यावेळी, शिवसेना नेते एकनाथ शिंदे आणि अजित पवार यांनीही उपमुख्यमंत्रीपदाची शपथ घेतली. या शपथविधी सोहळ्याला पतप्रधान नरेंद्र मोदी, केंद्रीय गृहमंत्री अमित शाह यांची प्रमुख उपस्थिती होती. त्यामुळे, अजित पवारांनी कालच उपमुख्यमंत्रीपदाची शपथ घेतल्यानंतर आज त्यांची संपत्ती मुक्त करण्यात आल्याचा निकाला बेनामी ट्रिब्युनलने दिल्यामुळे अनेकांच्या भुवया उंचावल्या आहेत. तर, राजकीय वर्तुळाताही याची चर्चा रंगली आहे. विशेष म्हणजे अजित पवारांनी महायुतीच्या सरकारमध्ये दुसऱ्यांदा उपमुख्यमंत्रीपदाची शपथ घेतल्यानंतर त्यांचे मिम्स आणि व्हिडिओही सोशल मीडियावर व्हायरल होत आहेत. ज्यामध्ये, संचिन घोटाळा आणि राष्ट्रवादीसोबत कदापी युती शक्य नसल्याचं देवेंद्र फडणवीस बोलत असल्याचे दिसून येते.
काय आहे नेमकं प्रकरण?
आयकर विभागाने ऑक्टोबर 2021 मध्ये छापा टाकून अजित पवार आणि त्यांच्या कुटुंबीयांशी कथितपणे संबंधित असलेली अंदाजे 1000 कोटी रुपयांची संपत्ती जप्त केली होती. अजित पवार व त्यांच्या नातेवाईकांशीृ संबंधित मुंबईतील प्रतिष्ठित नरिमन पॉइंट येथील निर्मल टॉवरसह पाच मालमत्तांवर टाच आणून ती जप्त केली होती. त्यामध्ये, एक साखर कारखाना आणि एक रिसॉर्टही जप्त करण्यात आल्याचे सांगण्यात येते. मात्र, याबाबत आम्ही नियमित टॅक्स भरतो, कुठलाही कर चुकवेगिरीपणा केलेला नाही, असे म्हणत अजित पवारांनी न्यायालयात दाद मागितली होती. अखेर, दिल्ली ट्रिब्युनल कोर्टाने अजित पवारांना मोठा दिलासा देत आयकर विभागाचे अपील फेटाळले आहे. तसेच, अजित पवारांची जप्त संपत्ती मुक्त करण्याचे आदेशही दिले आहेत.
