गोंदियात प्रवाशांना तिकीट दिल्यानंतर रूट बदल करीत असताना तिकीट मशीनमध्ये स्फोट होऊन कर्तव्यावर असलेली महिला वाहक गंभीर जखमी झाल्याची घटना गोंदियाच्या मुख्य बसस्थानक परिसरात घडली. महिला वाहकाचा केवळ पंजा भाजला असून सुदैवाने कोणतीही जिवीत हानी झाली नाही. मात्र त्या महिला वाहकाचे हात निकामी झाला आहे. कल्पना मेश्राम वय ३६ वर्ष असे जखमी महिला वाहकाचे नाव आहे.
दरम्यान, या प्रकरणी रामनगर पोलीस ठाण्यात सदर महिला वाहकाने तक्रार दाखल केली आहे. त्यामुळे एसटीच्या वाहकाजवळील तिकिट व्हेडिंग मशीन जिवंत बॉम्ब ठरत असल्याचे सिद्ध झाले असून भविष्यात मोठी दुर्घटना होण्याची शक्यता नाकारता येत नाही. तेव्हा मॅन्युअल तिकिट पद्धत चलनात आणून इलेक्ट्रॉनिक तिकिट मशीन बंद करण्याची मागणी समोर आली आहे.
एसटी बसने प्रवास करतेवेळी तिकीट इश्यू मशीनच्या माध्यमातून प्रवाश्यांना तिकीट पुरविली जात आहे. तर एका खासगी कंपनीकडून या मशीन उपलब्ध करून देण्यात आल्या आहे. मात्र, अल्पावधीतच निकृष्ट दर्जाची बॅटरी, बटण काम न करणे, तिकिटांची रक्कम मशीनमध्ये दाखवणे मात्र तिकीट छपाई न होणे, चुकीचे तिकीट येणे अशा तक्रारी कर्मचाऱ्यांकडून येऊ लागल्या होत्या असे असले तरी महामंडळाकडून मशीन दुरुस्त करण्याबाबत एसटी कर्मचाऱ्यांना दाद दिली जात नाही. त्यातच बुधवारी गोंदिया येथे घडलेल्या घटनेने मशीन सदोष असण्याला दुजोरा मिळाला आहे.
त्याचप्रमाणे अशा घटना भविष्यात घडू नये यासाठी वाहकांना पुरविण्यात आलेल्या जुन्या मशीन महामंडळाने जमा करून त्यांना नवीन मशीन उपलब्ध करून देण्यात यावे, घटनेत जखमी झालेल्या महिला वाहक कल्पना मेश्राम यांना उपचार खर्च व आर्थिक मदत देण्यात यावी अशी मागणी आता करण्यात आली आहे
