गोंदिया, दि.14 : जिल्हा अधीक्षक कृषी अधिकारी गोंदिया, प्रकल्प संचालक आत्मा व महिला आर्थिक विकास महामंडळ यांच्या संयुक्त विद्यमाने पौष्टिक तृणधान्य आधारित पाककला स्पर्धेचे आयोजन 14 जानेवारी 2024 रोजी मोदी मैदान, गोंदिया येथे करण्यात आले होते.
दैनंदिन मानवी आहारामध्ये पौष्टिक तृणधान्य जसे- ज्वारी, बाजरी, नाचणी, कुटकी, राजगिरा इत्यादी पौष्टिक धान्यांचा समावेश व्हावा, पौष्टिक तृणधान्यांपासून तयार होणाऱ्या पदार्थांना प्रोत्साहन मिळावे या दृष्टिकोनातून सदर पाककला स्पर्धेचे आयोजन करण्यात आले होते.
स्पर्धेमध्ये विविध बचत गटांच्या महिलांनी तसेच इतरही महिला स्पर्धकांनी मोठ्या संख्येने भाग घेतला होता. स्पर्धेमध्ये महिलांनी ज्वारी, बाजरी, नाचणी, कुटकी, राजगिरा इत्यादी तृणधान्यांपासून तयार होणारे विविध पदार्थ जसे- ज्वारीचे लाडू, बाजरीची खीर, बाजरीची भाकरी, चकली ,थालीपीठ, चीला, वडे, इडली,पराठे इत्यादी पदार्थ तयार करून स्पर्धेमध्ये ठेवले होते. स्पर्धेत भाग घेणाऱ्या स्पर्धकांसाठी प्रथम बक्षीस तीन हजार रुपये, द्वितीय बक्षीस दोन हजार रुपये व तृतीय बक्षीस एक हजार रुपये याप्रमाणे बक्षीसे ठेवण्यात आलेली होती.
स्पर्धेला परीक्षक म्हणून डॉ. तेजेश्वरी टेंभरे प्राध्यापिका एस.एस.गर्ल्स कॉलेज, डॉ. ईश्वरी खटवानी गोंदिया, डॉ. प्राजक्ता डोंगरवार आहारतज्ञ सहयोग रुग्णालय गोंदिया या लाभल्या होत्या. परीक्षकांनी सर्व स्टॉल्सला भेटी देवून महिलांनी तयार केलेल्या पदार्थांची चव घेऊन स्पर्धेचे परीक्षण करून निकाल जाहीर केला. यामध्ये चारुशीला भांडारकर यांनी प्रथम क्रमांक पटकाविला, मिनाक्षी बागडे यांनी द्वितीय क्रमांक तर दुर्गा वर्मा यांनी तृतीय क्रमांक पटकाविला.
विजेत्यांना परीक्षक म्हणून लाभलेल्या डॉ. तेजेश्वरी टेंभरे, डॉ. प्राजक्ता डोंगरवार, डॉ. ईश्वरी खटवानी, जिल्हा अधिक्षक कृषी अधिकारी हिंदुराव चव्हाण, प्रकल्प संचालक आत्मा अजित आडसुळे, महिला आर्थिक विकास महामंडळाचे वरिष्ठ जिल्हा समन्वय अधिकारी संजय संगेकर यांच्या हस्ते बक्षीसे व प्रशस्तीपत्रे प्रदान करण्यात आली. तसेच स्पर्धेमध्ये सहभागी झालेल्या सर्व महिलांना प्रशस्तीपत्रे प्रदान करण्यात आली. यावेळी पवन मेश्राम कृषी अधिकारी गोंदिया, तालुका कृषी अधिकारी महेंद्र दिहारे, राजेश पवार, नंदू वानखेडे मंडळ कृषी अधिकारी सालेकसा, महिला आर्थिक विकास महामंडळाचे सहाय्यक जिल्हा समन्वय अधिकारी सतीश मार्कंड उपस्थित होते.
