साकोली- तालुक्यातील शिवनीबांध जलाशयाच्या पाळीवर मासे पकडण्यासाठी गेलेला मासेमार मृतावस्थेत आढळून आला. सदर घटना दि.२७ मे रोजी रात्री ५ वाजता दरम्यान उघडकीस आली. सुरेश उपासराव वलथरे (५९) रा.शिवनीबांध असे मृतकाचे नाव आहे. मासेमाराचा मृत्यू अंगावर वीज कोसळल्याने झाल्याचा प्राथमिक अंदाज वर्तविला जात आहे.
सानगडी जवळील शिवनीबांध येथील सुरेश वलथरे हा दि.२७ मे रोजी सायं.५ वाजता दरम्यान मासे पकडण्याकरीता शिवनीबांध जलाशयावर गेला होता. मात्र पाण्यात उतरण्याच्या अगोदरच त्याचा मृत्यू झाला. घटना उघडकीस येताच याची माहिती साकोली पोलिसांना देण्यात आली. साकोली ठाण्यातील पोलीस कर्मचारी ब्रम्हा गावतूरे यांनी आपल्या इतर कर्मचार्यांसह घटनास्थळ गाठले. पाहणी केली असता मृतक हा तलावात जाळे टाकण्यासाठी कपडे काढून जात होता. मृतदेहाच्या बाजूला एका थैलीमध्ये मासे पकडणारा जाळ आढळून आला.
