कलपाथरी ग्रामपंचायतीत भ्रष्टाचाराच्या आरोपावरून कपाटाला सील

; शासकीय कामात अडथळ्याप्रकरणी पोलिसांत धाव

गोरेगाव :-कायद्यानुसार १५ ऑगस्ट रोजी ग्रामसभा घेणे अनिवार्य असताना, कल्पात्री ग्रामपंचायतीत ग्रामसभेच्या आयोजनावरून तीव्र वाद पेटला आहे. मागील पाच वर्षांच्या जमा-खर्चाचा हिशोब न दिल्याचा आरोप करत आक्रमक ग्रामस्थांनी थेट ग्रामपंचायतीच्या कपाटाला सील ठोकले. याप्रकरणी आता शासकीय कामात अडथळा निर्माण केल्याचा ठपका ठेवत पोलीस ठाण्यात तक्रार दाखल करण्याची प्रक्रिया सुरू झाल्याने गावात खळबळ उडाली आहे.

नेमकी काय घडली घटना?

• ग्रामसभेत गोंधळ: २१ ऑगस्ट रोजी आयोजित ग्रामसभा ग्रामसेवक गैरहजर असल्याने स्थगित करण्यात आली होती. त्यानंतर ३१ ऑगस्ट रोजी सरपंच शेषकुमार रहांगडाले यांच्या अध्यक्षतेखाली ही सभा पार पडली.

• हिशोबावरून आक्षेप: या सभेत मागील ५ वर्षांचा जमा-खर्च आणि दस्तऐवज सादर न केल्याचा आरोप अभिजीत पुरुषोत्तम मेंढे, सुजीत खरोले व अन्य ग्रामस्थांनी केला.

• कपाटाला सील: रागाच्या भरात ग्रामस्थांनी कार्यालयातील कपाटाला सील लावले. धक्कादायक बाब म्हणजे या सील लावण्याच्या कारवाईवर सरपंच रहांगडाले यांनीही स्वाक्षरी केल्याचे समोर आले आहे.

चौकशी अधिकाऱ्यांना ग्रामस्थांचा अटकाव

कपाटाला सील लावल्याने प्रशासकीय कामकाज ठप्प झाल्याची माहिती मिळताच, पंचायत समिती गोरेगावच्या खंडविकास अधिकाऱ्यांनी विस्तार अधिकारी टी. डी. बिसेन, ए. ए. सेवेकर आणि के. पी. कोरे (समूह समन्वयक, स्वच्छ भारत मिशन) यांना चौकशीसाठी कलपाथरी येथे पाठवले.मात्र, चौकशीसाठी आलेल्या या अधिकाऱ्यांना ग्रामस्थांनी रोखून धरले. “जोपर्यंत ग्रामपंचायतीकडून लेखी हमी मिळत नाही, तोपर्यंत चौकशी करू देणार नाही आणि कपाटाचे सीलही काढू देणार नाही,” अशी आक्रमक भूमिका ग्रामस्थांनी घेतली. यामुळे गावात काही काळ कायदा व सुव्यवस्थेचा प्रश्न निर्माण झाला होता.

पावसाळा व आपत्कालीन कामांवर परिणाम

ग्रामपंचायत प्रशासनाने दिलेल्या माहितीनुसार, सील केलेल्या कपाटात ब्लीचिंग पावडरची खरेदी, महत्त्वाची प्रशासकीय कागदपत्रे आणि डास प्रतिबंधक उपाययोजनांच्या फाईल्स आहेत. कपाट बंद असल्याने पावसाळ्यात गावात करावयाच्या आपत्कालीन आरोग्यदायी उपाययोजना व वरिष्ठ कार्यालयाला अहवाल पाठवण्यात मोठा अडथळा निर्माण झाला आहे.

गुन्हा दाखल करण्याची प्रक्रिया सुरू

शासकीय कामात अडथळा आणणे आणि ग्रामपंचायतीच्या मालमत्तेला बेकायदेशीरपणे सील ठोकल्याप्रकरणी संबंधितांविरुद्ध तात्काळ एफआयआर (FIR) नोंदवण्यात यावी, असे पत्र खंडविकास अधिकाऱ्यांनी गोरेगाव पोलीस ठाण्याला दिले आहे. तसेच ग्रामसेवक समितीच्या सदस्यांनीही एकजूट दाखवत पोलीस तक्रार नोंदवण्याची प्रक्रिया सुरू केली आहे.आता या संपूर्ण प्रकरणात पोलीस प्रशासन कायदेशीर कारवाई काय करते आणि कल्पात्री ग्रामपंचायतीचा हा वाद कोणता वळण घेतो, याकडे संपूर्ण तालुक्याचे लक्ष लागले आहे.