अर्जुनी मोरगाव-तालुक्यातील बोरटोला येथील जिल्हा परिषद प्राथमिक शाळेमध्ये नवनिर्मित व अत्याधुनिक वर्गखोलीचे लोकार्पण तसेच वार्षिक स्नेहसंमेलन कार्यक्रम मोठ्या उत्साहात व जल्लोषात पार पडला. या महत्त्वपूर्ण कार्यक्रमामुळे संपूर्ण गावासह परिसरात आनंद, उत्साह व अभिमानाचे वातावरण निर्माण झाले होते. शाळेच्या शैक्षणिक विकासाच्या दृष्टीने हा कार्यक्रम मैलाचा दगड ठरणारा असल्याची भावना यावेळी व्यक्त करण्यात आली.
नवनिर्मित वर्गखोलीचे लोकार्पण जिल्हा परिषद अध्यक्ष लायकराम भेंडारकर यांच्या अध्यक्षतेखाली संपन्न झाले. यावेळी विद्यार्थ्यांना व पालकांना मार्गदर्शन करताना लायकराम भेंडारकर यांनी सांगितले की, आधुनिक काळातील शिक्षण हे केवळ पुस्तकांपुरते मर्यादित न राहता ते अनुभवाधारित, तंत्रज्ञानाधिष्ठित व विद्यार्थीकेंद्रित असणे आवश्यक आहे. नव्याने उभारण्यात आलेली ही सुसज्ज वर्गखोली विद्यार्थ्यांच्या सर्वांगीण विकासाला पूरक ठरेल. स्वच्छ, हवेशीर, सुरक्षित व आधुनिक सुविधा असलेल्या वर्गखोलीत शिक्षण घेतल्यास विद्यार्थ्यांमध्ये अभ्यासाविषयीची गोडी वाढते, एकाग्रता सुधारते आणि शिकण्याची क्षमता अधिक प्रभावीपणे विकसित होते, असे त्यांनी नमूद केले.
मार्गदर्शन करताना त्यांनी पुढे सांगितले की, ग्रामीण भागातील विद्यार्थ्यांनाही शहरातील विद्यार्थ्यांप्रमाणेच दर्जेदार शिक्षण सुविधा मिळाल्या पाहिजेत. दर्जेदार पायाभूत सुविधा उपलब्ध करून दिल्यास विद्यार्थ्यांच्या गुणवत्तेत निश्चितच वाढ होते. शिक्षकांनाही अशा आधुनिक वर्गखोलीमुळे अध्यापन करताना विविध उपक्रम, दृकश्राव्य साधने व नाविन्यपूर्ण पद्धतींचा वापर करता येतो, त्यामुळे शिक्षण अधिक रुचकर व परिणामकारक बनते, असे मत त्यांनी व्यक्त केले.
यावेळी वार्षिक स्नेहसंमेलनाचे महत्त्व विशद करताना त्यांनी सांगितले की, स्नेहसंमेलन हे विद्यार्थ्यांच्या सर्वांगीण विकासाचे प्रभावी माध्यम आहे. अशा कार्यक्रमांमधून विद्यार्थ्यांच्या कलागुणांना वाव मिळतो, त्यांचा आत्मविश्वास वाढतो तसेच मंचावर आपले विचार व कला सादर करण्याचे धाडस निर्माण होते. नृत्य, नाट्य, गायन, भाषण अशा विविध सांस्कृतिक कार्यक्रमांमुळे विद्यार्थ्यांचा सांस्कृतिक, बौद्धिक व सामाजिक विकास साधला जातो. यासोबतच विद्यार्थ्यांमध्ये शिस्त, संघभावना, वेळेचे नियोजन, सहकार्याची भावना आणि नेतृत्वगुण विकसित होतात, असेही त्यांनी नमूद केले.
कार्यक्रमाला आमदार तथा माजी मंत्री राजकुमार बडोले, पंचायत समिती उपसभापती संदिप कापगते, माजी उपसभापती राजेष कठाणे, कृ.उ.बा.स. संचालक लोकपाल गहाणे, कुरूंदा येथील सरपंच वैद्य, उपसरपंच काशिनाथ कापसे, शालेय व्यवस्थापन समिती अध्यक्ष विलास गुढेवार, पोलीस पाटील संगिता भेंडारकर, माजी सरपंच गिता नारनवरे, तुलाराम येरणे, ताराचंद येरणे, कृष्णा येरणे, गुलाब ढोक, संदिप तरोणे, प्रेमलाल नारनवरे, ग्रामविकास अधिकारी आर.पी. शहारे, विवेकानंद सयाम, विपीन खंडाईत, मुख्याध्यापक वाल्मीक मेश्राम, पाथरीकरजी, निता मेश्राम, मनोहर गुडेवार, सुरेखा ब्राम्हणकर, पपिता नंदेश्वर (सरपंच पवनी), निशा खोब्रागडे, भारती डोये यांच्यासह अनेक मान्यवर, शिक्षक, शिक्षिका, विद्यार्थी-विद्यार्थिनी तसेच महिला व पुरुष ग्रामस्थ मोठ्या संख्येने उपस्थित होते.
कार्यक्रमात विद्यार्थ्यांनी सादर केलेल्या रंगारंग सांस्कृतिक कार्यक्रमांनी उपस्थितांची मने जिंकली. पालकांनीही विद्यार्थ्यांच्या कला सादरीकरणाचे भरभरून कौतुक केले. नवनिर्मित वर्गखोलीमुळे शाळेच्या शैक्षणिक गुणवत्तेत निश्चितच सकारात्मक बदल घडून येईल, असा विश्वास उपस्थित मान्यवरांनी व्यक्त केला. कार्यक्रम यशस्वी करण्यासाठी मुख्याध्यापक, शिक्षकवृंद, शालेय व्यवस्थापन समिती व ग्रामस्थांनी विशेष परिश्रम घेतले.
