गोंदिया जिल्हा क्षयरोगमुक्त करण्यासाठी प्रशासनाची महत्त्वपूर्ण बैठक

; जिल्हाधिकारी आणि मुख्य कार्यकारी अधिकाऱ्यांच्या उपस्थिती
​गोंदिया:जिल्ह्यात क्षयरोग निर्मूलनासाठी सुरू असलेल्या प्रयत्नांना अधिक गती देण्यासाठी आणि विविध सहव्याधींच्या (Comorbidity) संदर्भात धोरणात्मक निर्णय घेण्यासाठी गोंदिया जिल्हा क्षयरोग फोरम व जिल्हा सहव्याधी समितीची विशेष बैठक आज, २६ फेब्रुवारी २०२६ रोजी पार पडली.
​या बैठकीचे अध्यक्षस्थान जिल्हाधिकारी प्रजित नायर यांनी भूषविले, तर जिल्हा परिषदेचे मुख्य कार्यकारी अधिकारी मुरूगनाथम एम. हे सहअध्यक्ष म्हणून उपस्थित होते. बैठकीचे संचालन जिल्हा क्षयरोग अधिकारी (DTO) व जिल्हा आरोग्य अधिकारी (DHO) डॉ. अभिजीत गोल्हार यांनी केले.
गोंदिया जिल्ह्याला ‘क्षयरोगमुक्त’ करण्याच्या ध्येयाकडे वाटचाल करताना, केवळ क्षयरोगच नव्हे, तर त्याशी संबंधित इतर आरोग्य समस्या (सहव्याधी) असलेल्या रुग्णांवर प्रभावी उपचार कसे करता येतील, यावर या बैठकीत सविस्तर चर्चा करण्यात आली.
यावेळी जिल्हाधिकारी प्रजित नायर आणि मुख्य कार्यकारी अधिकारी मुरूगनाथम एम. यांनी राष्ट्रीय क्षयरोग निर्मूलन कार्यक्रमांतर्गत (NTEP) उत्कृष्ट कामगिरी केल्याबद्दल संबंधित टीमचे विशेष कौतुक करून त्यांना सन्मानित केले. कर्मचाऱ्यांचे हे अभिनंदन उपस्थितांसाठी प्रेरणादायी ठरले.
​प्रमुख उपस्थिती:
या महत्त्वपूर्ण बैठकीत जिल्हा शल्य चिकित्सक डॉ. पी. के. पटले, अतिरिक्त जिल्हा शल्य चिकित्सक डॉ. तृप्ती कटरे, आयएमए (IMA) प्रतिनिधी, दृष्टी एनजीओचे प्रतिनिधी, नामवंत पत्रकार आणि समितीचे इतर सदस्य उपस्थित होते.
​गोंदिया जिल्ह्याला क्षयरोगाच्या विळख्यातून मुक्त करण्यासाठी प्रशासकीय स्तरावर सुरू असलेल्या या व्यापक मोहिमेमुळे जिल्ह्यातील आरोग्य सेवेला अधिक बळकटी मिळणार आहे.