कोल्हापूर दि.17- राजमाता जिजाऊ यांच्या जीवनावर आधारित हिंदी भाषेत ‘जिजामाता’ खंडकाव्य लवकरच प्रकाशित होणार आहे. हिंदी भाषेतून जिजाऊंच्या कार्याचा गौरव व्हावा, या उद्देशाने शिवाजी विद्यापीठातील हिंदी विभागप्रमुख डॉ. पद्मा पाटील यांनी ते लिहिले असून, खंडकाव्याची सुमारे १८० पाने लिहून तयार झाली आहेत. त्यानिमित्ताने हिंदीतून जिजाऊंचे कार्य देशभर प्रसारित होण्यास मदत होणार आहे.
मराठा स्त्रियांच्या पराक्रमाची गाथा सांगणारी पुस्तके हिंदी भाषेत किती आहेत, याचा शोध घेतल्यास त्याचे उत्तर नकारार्थी द्यावे लागते, अशी स्थिती आहे. जिजाऊ, ताराराणी, येसूबाई, करवीरकर जिजाबाई यांच्या कार्य कर्तृत्वाचा प्रसार देशभर प्रसारित होणे आवश्यक असताना, त्यांच्यावर आधारित हिंदी भाषेत साहित्यच उपलब्ध नसल्याची स्थिती आहे. ‘साहित्य और इतिहास’ या हिंदी भाषेतील पुस्तकात डॉ. पाटील यांनी लिहिलेल्या लेखात ‘जिजाऊं’च्या कार्यावर प्रकाशझोत टाकला आहे. त्यांनी मराठा स्त्रियांच्या कार्यकर्तृत्वावर भर देण्याच्या उद्देशाने जिजाऊ, ताराराणी यांच्यावर छोटे-मोठे लेख हिंदीतून लिहिले आहेत.
खंडकाव्यात शिवछत्रपतींवर जिजाऊँनी संस्कार कसे केले, शिवछत्रपतींच्या जन्मापूर्वीची पराक्रमी व्यक्तिमत्त्वे कोण, शिवरायांवर संस्कारांसाठी पुराणासाठी कशा पद्धतीने आधार घेतला, याचा उल्लेख आहे. लखुजी जाधव यांच्या छत्रछायेत जिजाऊँनी युद्धकलेचे घेतलेले प्रशिक्षण, जिजाऊँनी शिवरायांच्या मनात स्वराज्य व स्वाभिमानाचे रूजविलेले बीज, याचाही ऊहापोह केला आहे.
