पुणे,दि.20 – महाराष्ट्र अंधश्रद्धा निर्मूलन समितीचे डॉ. नरेंद्र दाभोलकर यांच्या हत्येला सोमवारी ५ वर्षे पूर्ण होत आहे. मात्र, अजूनही या हत्येमागील मास्टरमाईंड सापडत नाही. याच्या निषेधार्थ शहरातील विठ्ठल रामजी शिंदे पूल, लक्ष्मी रोड, अलका चौक, दांडेकर पूल, साने गुरुजी स्मारक या मार्गावर ‘जवाब दो’ निषेध रॅलीचे आयोजन करण्यात आले आहे.या रॅलीत अभिनेत्री सोनाली कुलकर्णी, महात्मा गांधींचे पणतू तुषार गांधी, मेघा पानसरे, शैला दाभोलकर, अतुल पेठे, मुक्ता दाभोलकर, हमीद दाभोलकर, सुभाष वारे, अजित अभ्यंकर यांच्यासह अंनिसचे कार्यकर्ते, नागरिक आणि विद्यार्थी मोठ्या प्रमाणात सहभागी झाले आहेत.अंधश्रद्धा आणि बुवाबाजी यासारख्या अनिष्ट रुढी परंपरांविरुद्ध लढणारे ज्येष्ठ कार्यकर्ते डॉ. नरेंद्र दाभोलकर यांची २० ऑगस्ट २०१३ ला पुण्यातील ओकांरेश्वर मंदिराजवळील महर्षी शिंदे पुलावर गोळ्या घालून हत्या करण्यात आली होती. राज्य पोलीस आणि सीबीआयचे पथक या प्रकरणातील आरोपींचा शोध घेत होते. सध्या या प्रकरणात पोलिसांनी शरद कळसकर आणि सचिन अंदुरे या दोघांना अटक केली आहे. या दोघांनाही सीबीआयने ताब्यात घेतले आहे.
