नागपूर,दि.08- राज्याचे गृहमंत्री अनिल देशमुख यांच्या घारत परत एकदा गुलाल उढळला जाणार आहे. अनिल देशमुखांचे चिरंजीव सलील देशमुख जिल्हा परिषद निवडणुकीत विजयी झाले आहेत. राष्ट्रवादीच्या तिकीटावर निवडणुकीच्या रिंगणात उतरलेल्या सलील देशमुखांनी नागपुरातील मेटपांजरा येथून विजयी मिळवला. नागपूर जिल्हा परिषद सदस्य म्हणून सलील देशमुख पहिल्यांदाच निवडणुकीच्या रिंगणात उतरले होते. तिकडे नागपूर जिल्हा परिषद निवडणुकीत केंद्रीय मंत्री नितीन गडकरी आणि माजी मंत्री चंद्रशेखर बावनकुळे यांना धक्का बसला आहे. गडकरींचे मूळ गाव धापेवाडा येथून काँग्रेसचे महेंद्र डोंगरे विजयी झाले आहेत. तर बावनकुळे यांच्या कोराडी जिल्हा परिषद सर्कलमधून काँग्रेसचे उमेदवार नाना कंभाले विजयी झालेत.माजी मुख्यमंत्री देवेंद्र फडणवीस यांना घरच्या मैदानावर मोठा धक्का बसला आहे. नागपूर जिल्हा परिषदेच्या निकालाचा कौल भाजपाच्या विरोधात गेला आहे.
सलील देशमुख राष्ट्रवादीचे सक्रिय कार्यकर्ते आहेत. यापूर्वी अनिल देशमुखांनी विधानसभेसाठी मुलाची शिफारस केली होती. पण, विधानसभावारी हुकलेल्या सलील देशमुखांना जिल्हा परिषदेत झेंडा रोवण्यात यश आले आहे. नागपूरचा गड राखताना भाजपची चांगलीच दमछाक होत आहे. काँग्रेस आणि राष्ट्रवादीने नागपुरात चांगली पकड घेतल्याचे दिसत आहे. केंद्रीय मंत्री नितीन गडकरी आणि माजी मंत्री चंद्रशेखर बावनकुळे यांनाही धक्का बसला आहे.
