गडचिरोली : गोपनिय माहितीच्या आधारे पोलिसांनी मरपल्ली पोलीस मदत केंद्राच्या हद्दीतील करंचा गावाजवळच्या जंगलात ठेवलेली स्फोटके शोधून काढली. तसेच ती जागेवरच नियंत्रितपणे स्फोट घडवून नष्ट करण्यात आली. गडचिरोली पोलिसांच्या सतर्कतेमुळे माओवाद्यांचा घातपात घडवुन आणण्याचा व सुरक्षा दलास नुकसान पोहोचविण्याचा डाव हाणून पाडण्यात यश आले आहे.
दि.15 रोजी मिळालेल्या विश्वसनिय माहितीच्या आधारे जिमलगट्टाचे उपविभागीय पोलीस अधिकारी शशीकांत दसुरकर यांच्या नेतृत्वात पोलीस व एसआरपीएफच्या संयुक्त पथकाने सदर जंगल परिसरात शोध अभियान सुरू केले. या अभियानादरम्यान पथकांना करंचा गावाच्या जंगल परिसरात स्फोटक साहित्यांचा साठा मिळून आला. त्यामध्ये एक प्लास्टिक ड्रममध्ये अंदाजे एक ते दोन किलो स्फोटकांनी भरलेली किटलीतील (IED) आयईडी, तीन वायर बंडल, एक बॅटरी, एक डेटोनेटर इ. स्फोटक साहित्य होते. सदर साठा (डम्प) संशयास्पद वाटल्याने तात्काळ प्राणहितावरून बाँब शोधक व नाशक पथक घटनास्थळी पाठविण्यात आले. स्फोटक साहित्यांनी भरलेली किटली त्याच स्थितीत घटनास्थळी नियंत्रित स्फोटाद्वारे नष्ट करण्यात आली.
तसेच तीन वायर बंडल, एक बॅटरी, एक डिटोनेटर इत्यादी साहित्य घटनास्थळावरुन जप्त करण्यात आले. या सर्व कार्यवाहीत सुरक्षा दलातील कोणत्याही जवानाला दुखापत झालेली नाही, तसेच सर्व पोलीस पथके पोमकें मरपल्ली येथे सुखरुप पोहोचली.
ही कार्यवाही पोलीस अधीक्षक नीलोत्पल, अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम.रमेश, अपर पोलीस अधीक्षक (अहेरी) श्रेणिक लोढा यांच्या मार्गदर्शनाखाली उपविभागीय पोलीस अधिकारी शशीकांत दसूरकर यांच्या नेतृत्वात बीडीडीएस प्राणहिता पथकाचे प्रमुख स.फौ. बंडू आत्राम व जवानांकडून करण्यात आली.
