
नागपूर,दि.१८जानेवारी : नागपूर ग्रामीण पोलीस विभागाचे पोलीस अधीक्षक हर्ष पोद्दार यांच्या सुरक्षारक्षकाने स्वत:वर गोळी झाडून आत्महत्येचा प्रयत्न केल्याची घटना आज दि.१८ जानेवारीला शनिवारला सकाळी सहा वाजेच्या सुमारास घडली.गोळीच्या आवाजामुळे सहकारी कर्मचारी आणि पोलीस अधीक्षकांनी धाव घेतली.त्याला गंभीर जखमी अवस्थेत एम्स रुग्णालयात दाखल करण्यात आले असून सध्या उपचार सुरु आहे.
गोळी झाडून आत्महत्येचा प्रयत्न करणार्या हवालदाराचे नाव विशाल तुमसरे (वय ५०, रा. जयताळा) असे आहे.ही घटना घडताच पोलीस उपायुक्त लोहित मतानी आणि हिंगण्याचे ठाणेदार जितेंद्र बोबडे यांनी लगेच घटनास्थाळावर पोहचून घटनेची माहिती घेतली.
पोलिसांनी दिलेल्या माहितीनुसार, विशाल तुमसरे हे नागपूर ग्रामीण पोलीस मुख्यालयात कार्यरत आहेत. त्यांची सध्या पोलीस अधीक्षक हर्ष पोद्दार यांच्या बंगल्यावर गार्ड ड्युटी आहे. विशाल हे नेहमीप्रमाणे शुक्रवारी रात्रपाळीत कर्तव्यावर हजर झाले. त्यांच्या बंगल्यावर सुरक्षा करण्याची जबाबदारी त्यांची होती. शनिवारी सकाळी सहा वाजताच्या सुमारास विशालने गार्ड रुममध्ये शासकीय पिस्तूलातून स्वतःच्या हनुवटीतून गोळी झाडून आत्महत्या करण्याचा प्रयत्न केला. ती गोळी हनुवटीतून थेट डोक्याच्या दिशने बाहेर गेली. गोळी झाडण्याचा आवाज ऐकू येताच पोलीस अधीक्षकासह एक कर्मचाऱ्याने गार्ड रुमकडे धाव घेतली. विशाल हे रक्ताच्या थारोळ्यात तडफडतांना दिसले. पोलीस कर्मचाऱ्यांनी लगेच विशाल यांनी एम्स रुग्णालयात दाखल केले. त्यांच्यावर सध्या आयसीयूमध्ये उपचार सुरु असून प्रकृती अत्यंत नाजूक असल्याची माहिती वैद्यकीय सूत्रांनी दिली. या प्रकरणी हिंगणा पोलिसांनी या घटनेची नोंद घेतली असून पुढील तपास सुरु आहे.
विशाल तुमसरे यांनी सलग राज्य राखीव पोलीस दलात नोकरी केली आहे. तेथून निवृत्त झाल्यानंतर २०२३ मध्ये ते नागपूर ग्रामीण पोलीस दलात भरती झाले. विशाल यांना पत्नी आणि दोन मुली आहेत. पत्नी एका खासगी शाळेत नोकरी करते तर मुलींचे शिक्षण सुरु आहे. विशाल यांनी शेअर मार्केटमध्ये मोठ्या प्रमाणात पैसा गुंतविला होता. मात्र, त्यात बराच पैसा बुडल्याने त्यांची आर्थिक परिस्थिती बिकट झाली होती. कौटुंबिक समस्या आणि पैशाची चणचण या विवंचनेतून विशालने आत्महत्येचा प्रयत्न केल्याची माहिती आहे.