घरगुती भांडणातून पोटच्या मुलानेच आपल्या जन्मदात्रीला जीवंत जाळण्याचा प्रयत्न केल्याची घटना देवरी तालुक्यातील चिल्हाटी येथे 26 फेबु्रवारी रोजी रात्रीच्या सुमारास घडली.
इमलाबाई परमेश्वर बाळाबाग (59) रा. चिल्हाटी असे आईचे नाव आहे. त्यांच्यावर चिचगड येथील ग्रामीण रुग्णालयात उपचार सुरू आहे. तर डोमनदास परमेश्वर बाळाबाग (41) रा. चिल्हाटी असे आरोपी मुलाचे नाव असून चिचगड पोलिसांनी याप्रकरणी गुन्हा नोंद करून त्यास ताब्यात घेतले आहे.
आरोपी डोमनदास व त्याचा लहान भाऊ गुपेंद्रदास परमेश्वर बाळाबाग (38) या दोघांनी गावात खासदार निधी अंतर्गत एका समाज भवनाचे बांधकाम केले. दरम्यान, आरोपी डोमनदास याने गुपेंद्रदास याचेकडे मला पैशांची गरत आहे. तेव्हा कामाचे बिल निघाल्यानंतर तु ठेव असे बोलून पैशांची मागणी केली. यावेळी गुपेंद्रदासने आपल्याकडे पैस नसल्याचे बोलला असता आरोपी डोमनदास याने त्याच्याशी वाद घातला. दरम्यान त्यांची आई ईमलाबाई यांनी मध्यस्थी करून डोमनदास यास हटकल्याने तो घरातून निघून गेला. मात्र, काही वेळानंतर डोमनदास घरी परत आल्यानंतर त्याने बांबूच्या काठीला कापड बांधून त्याला आग लावली व घरासमोर ठेवलेल्या दोन दुचाकींना आग लावून 40 हजार रुपयांचे नुकसान केले.
तर एवढ्यावरच न थांबता त्याने पेट घेतलेली काठी खिडकीतून आपल्या आईकडे भिरकावली व त्यावर पुन्हा पिचकारीच्या सहाय्याने पेट्रोल टाकून आईला जीवंत जाळण्याचा प्रयत्न केला. ज्यामध्ये त्याची ईमलाबाई या भाजल्याने गंभीर जखमी झाल्या. यावेळी शेजारील नागरिकांनी त्यांना चिचगड येथील ग्रामीण रुग्णालयात उपचारासाठी भर्ती केले. दरम्यान, घटनेची माहिती चिचगड पोलिसांना देण्यात आली. पोलिसांनी घटनास्थळ गाठून पंचनामा केला व ईमलाबाई बाळाबाग यांच्या तक्रारीवरून गुन्हा नोंद करून डोमनदास यास ताब्यात घेतले. दरम्यान, याच प्रकरणात आरोपी डोमनदास याच्या तक्रारीवरून चिचगड पोलिस ठाण्यात त्याचा लहान भाऊ गुपेंद्रदास बाळाबाग याच्या विरोधात मारहाणीचा गुन्हा नोंद केला आहे. पुढील तपास सहाय्यक पोलिस निरीक्षक काळेल करीत आहेत.
