चंद्रपूर : पठाणपुरा मार्गावरील भर वस्तीतील बियर बारमध्ये दोन पोलीस शिपाई व काही युवक यांच्यात शाब्दिक भांडण झाले. त्यानंतर पोलीस व युवक बार मधून बाहेर पडले. दोन्ही पोलीस शिपाई घराकडे परत येत असताना मागून युवकांची टोळी आली आणि गल्लीत दोन्ही पोलीस शिपाई यांना गाठून गुप्तीने सपासप वार केले. या अचानक झालेल्या हल्ल्यात दिलीप चव्हाण (३६) या पोलीस शिपायाचा मृत्यू झाला तर शिपाई समीर चाफले (३४) गंभीर जखमी आहे. ही घटना शुक्रवारी रात्री १० वाजताचे सुमारास घडली. दरम्यान जिल्ह्यात गुन्हेगारी वाढली असून सर्रास हत्या, खून, होत असल्याने पोलिसांच्या कार्यक्षमतेवर प्रश्नचिन्ह निर्माण झाले आहे.
शहरातील विठ्ठल मंदिर प्रभागात राहणारे व पोलीस विभागात कॉन्स्टेबल असलेले दिलीप चव्हाण व समीर चाफले शुक्रवारी रात्री ९ वाजताच्या सुमारास पठाणपुरा मार्गावरील वैभव बानकर यांच्या पिंक पॅराडाईज या बियर बारमध्ये साध्या वेशात मद्य प्राशन करीत बसले होते. त्याच वेळी या बारमध्ये दाद महाल वॉर्डातील काही युवक देखील मद्य पीत होते. पोलीस शिपाई व युवकांमध्ये काही कारणावरून सुरुवातीला बाचाबाची झाली. त्यानंतर शाब्दिक भांडण हातापाईवर आले. एकमेकांना मारहाण केल्यानंतर बघून घेईल असा दम देत युवक व पोलीस शिपाई बार मधून बाहेर पडले. पोलीस शिपाई चाफले याचे घर बियर बारच्या मागे आहे. त्यामुळे शिपाई चाफले व चव्हाण पायदळ घराकडे जात असताना मागवून युवकांची टोळी आली आणि रात्रीचा अंधार बघून गल्लीतच युवकांनी चव्हाण व चाफले या दोन्ही पोलिसांवर गुप्ती व चाकूने सपासप वार केले. यात युवकांनी चव्हाण यांच्या छातीत गुप्ती आरपार टाकल्याने तो तिथेच पडला तर चाफले यांच्या हात व छातीवर गुप्तीने वार केल्याने गंभीर जखमी झाला.
ही घटना बघून आजूबाजूचे लोक धावले आणि दोन्ही पोलीस शिपाई यांना जिल्हा रुग्णालयात नेण्यात आले. तिथे डॉक्टरांनी चव्हाण यांना मृत घोषित केले तर चाफले याला डॉ. चेपुरवार यांच्या खासगी हॉस्पिटल मध्ये दाखल करण्यात आले आहे. त्याचीही प्रकृती गंभीर आहे. या घटनेची माहिती मिळताच पोलीस अधीक्षक मुमक्का सुदर्शन, अति. पोलीस अधीक्षक रिना जनबंधू, शहर पोलीस ठाण्याच्या पोलीस निरीक्षक एकुरे घटनास्थळी दाखल झाल्या. पोलिसांनी या हत्या प्रकरणी तीन जणांना ताब्यात घेतले आहे. मागील काही दिवसांपासून शहरात गुन्हेगारी वाढली आहे. हत्या, खून प्रमाण वाढले आहे. तेव्हा गुन्हेगारांचा बंदोबस्त करावा अशी मागणी समोर आली आहे.
