‘इंद्रधनुष्य’ वर मुंबई विद्यापीठाची विजयी पताका
मुंबई, दि. १५ नोव्हेंबर: १८ व्या राज्यस्तरीय आंतरविद्यापीठ सांस्कृतिक युवा महोत्सव ‘इंद्रधनुष्य’ मध्ये मुंबई विद्यापीठाने बाजी मारत अव्वल स्थान पटकावले आहे. ५ ते ९ नोव्हेंबर २०२२ दरम्यान महात्मा फुले कृषी विद्यापीठ, राहूरी येथे आयोजित करण्यात आलेल्या या युवा महोत्सवामध्ये मुंबई विद्यापीठाची विजयी मोहोर उमटली आहे. विशेष बाब म्हणजे आतापर्यंत मुंबई विद्यापीठाने स्पर्धेच्या १८ वर्षाच्या कारकिर्दीमध्ये तब्बल १७ वेळा हा चषक आपल्याकडे राखण्याचा बहुमान मिळविला आहे. वाड्मय, ललितकला, संगीत, नाट्य आणि नृत्य या स्पर्धांमध्ये विजयी सलामी देत सांस्कृतिक युवा महोत्सवामध्ये मुंबई विद्यापीठाने ११९ गुणांची कमाई करत सर्वसाधारण विजेतेपद मिळवून अव्वल स्थान पटकावले आहे. द्वितीय क्रमांक प्राप्त झालेल्या विद्यापीठास ८७ गुण मिळाले आहेत. या राज्यस्तरीय आंतरविद्यापीठ सांस्कृतिक युवा महोत्सव ‘इंद्रधनुष्य’मध्ये राज्यातील २१ विद्यापीठे सहभागी झाली होती.
मुंबई विद्यापीठाच्या परीक्षेत्रातील विविध महाविद्यालयातील विद्यार्थ्यांनी भारतीय शास्त्रीय तालवाद्य, भारतीय शास्त्रीय नृत्य, भारतीय लोकनृत्य, वक्तृत्व, प्रश्नमंजूषा, माती शिल्पकाम, चित्रकला, पोस्टर, रांगोळी या विभागामध्ये सुवर्ण पदक मिळवून निर्विवाद वर्चस्व मिळविले आहे. यासोबत विविध स्तरावरील सर्वसाधारण चषकांमध्ये पाश्चिमात्य एकल वाद्यवादन, भारतीय समूह गीत, लोक वाद्यवृंद, नकला, इंस्टालेशन या स्पर्धांमध्ये रौप्य पदक प्राप्त केले आहे. तर पाश्चिमात्य एकलगायन, भारतीय सुगम संगीत गायन, मूकनाट्य, वाद-विवाद स्पर्धांमध्ये कांस्य पदक प्राप्त केले आहे. पाच विभागापैकी नृत्य, नाट्य, साहित्य आणि ललितकला विभागात सर्वसाधारण विजेतेपद प्राप्त केले आहे. विशेष म्हणजे कुमारी रिया मोरे या विद्यार्थीनीने विविध पाच स्पर्धांमध्ये सहभाग घेऊन सर्वात जास्त बक्षिस मिळवून सुवर्ण कन्येचा (गोल्डन गर्ल) किताब मिळवला. विद्यापीठाच्या ४२ विद्यार्थ्यांच्या संघानी या सर्व कलाप्रकारात सहभाग घेतला होता.
या स्पर्धेसाठी मार्गदर्शक म्हणून मुंबई विद्यापीठाचे राष्ट्रीय स्तरावरील विजेते व माजी विद्यार्थी विजय जाधव, वैभव सतरंगे, साहिल जोशी, अभिजीत मोहिते, रोहण कोतेकर, विलास रहाटे, केशर चोपडेकर, महेश कापरेकर, सागर चव्हाण, अमोल बावकर या सर्वांचे सहकार्य लाभले असून विद्यार्थी विकास विभागाचे संचालक डॉ. सुनिल पाटील आणि सांस्कृतिक समन्वयक निलेश सावे यांनी यशस्वीरित्या या स्पर्धेचे नियोजन केले होते. मुंबई विद्यापीठाचे कुलगुरू प्रा. दिगंबर शिर्के, प्र-कुलगुरू प्राचार्य. डॉ. अजय भामरे, प्रभारी कुलसचिव प्रा. शैलेंद्र देवळाणकर आणि वित्त व लेखा अधिकारी प्रा. प्रदीप कामथेकर यांनी विजयी चमूचे अभिनंदन करुन भावी वाटचालीस शुभेच्छा दिल्या.
