दुहेरी पदवी, सह पदवीसह संशोधनाच्या क्षेत्रात संधींचे नवे दालन होणार खुले
लंडन विद्यापीठ, लंडन स्कूल ऑफ इकॉनॉमिक्स अँड पोलिटिकल सायन्स, एसओएएस शापूरजी पालनजी इन्स्टिट्यूट ऑफ झोरोस्ट्रियन स्टडीज, ऑक्सफोर्ड विद्यापीठ आणि कॅम्ब्रिज विद्यापीठांशी चर्चा
मुंबई, दि. १९ एप्रिलः उच्च शिक्षणाच्या आंतरराष्ट्रीयकरणाच्या दिशेने वाटचाल करताना मुंबई विद्यापीठाने आघाडी घेत युकेमधील प्रतिष्ठित विद्यापीठांशी शैक्षणिक सामंजस्य करार करण्यासाठी पुढाकार घेतला आहे. यामध्ये लंडन स्कूल ऑफ इकॉनॉमिक्स अँड पोलिटिकल सायन्स, युनिव्हर्सिटी ऑफ लंडन, एसओएएस युनिव्हर्सिटी ऑफ लंडन, एसओएएस शापूरजी पालनजी इन्स्टिट्यूट ऑफ झोरोस्ट्रियन स्टडीज, ऑक्सफोर्ड विद्यापीठ आणि कॅम्ब्रिज विद्यापीठ अशा प्रतिष्ठित विद्यापीठ आणि उच्च शिक्षण संस्थांचा समावेश आहे. नुकत्याच मुंबई विद्यापीठाच्या शिष्टमंडळाच्या वतीने कुलगुरू प्रा. रवींद्र कुलकर्णी, कुलसचिव प्रा. बळीराम गायकवाड आणि राष्ट्रीय आणि आंतरराष्ट्रीय साहचर्य व विद्यार्थी सहाय्य केंद्राचे समन्वयक डॉ. सुनील पाटील यांनी या विद्यापीठांना भेटी देऊन तेथील प्रतिनिधींशी उच्च शिक्षणातील विविध संधींवर चर्चा करून शैक्षणिक सामंजस्य करार करण्यासाठी स्वारस्य दाखवले.
राष्ट्रीय शैक्षणिक धोरण अंमलबजावणीच्या अनुषंगाने विद्यार्थ्यांना अनुभवात्मक आणि कौशल्य प्रशिक्षण, श्रेणी हस्तांतरण, दुहेरी पदवी, सह पदवी, ऑनलाईन आणि प्रत्यक्ष इंटर्नशिप, विद्यार्थी-शिक्षक आदान –प्रदान विविध शैक्षणिक कार्यक्रम, विज्ञान आणि तंत्रज्ञानाच्या क्षेत्रात संशोधन, सह सांस्कृतिक कार्ये आणि शैक्षणिक साहित्य-संसाधन निर्मिती व हस्तांतरण अशा विविध क्षेत्रातील संधीचे दालन खुले व्हावे यासाठी या विद्यापीठांबरोबर करार केले जाणार आहेत. उच्च शिक्षणाच्या आंतरराष्ट्रीयकरणाच्या दृष्टिकोनातूनही या करारांचे महत्व अधोरेखित होणार आहे.
लंडन स्कूल ऑफ इकॉनॉमिक्स अँड पोलिटिकल सायन्स संस्थेसोबत मुंबई स्कूल ऑफ इकॉनॉमिक्स अँड पब्लिक पॉलिसी विभागाशी शैक्षणिक सामंजस्याअंतर्गत सह पदवी, संयुक्त संशोधन प्रकल्प आणि विविध उपक्रम राबविले जाणार आहेत. एसओएएस शापूरजी पालनजी इन्स्टिट्यूट ऑफ झोरोस्ट्रियन स्टडीज या संस्थेसोबत मुंबई विद्यापीठाच्या अवेस्ता पहलवी केंद्राच्या वतीने राबविण्यात येणारे विविध उपक्रम, ट्विनींग प्रोग्राम, परिसंवाद, कार्यशाळा आणि संयुक्त संशोधन प्रकल्पासाठी शैक्षणिक सामंजस्य करण्यात येणार आहे. संयुक्त ऑनलाईन पदवी, संयुक्त संशोधन प्रकल्प, मूक्स आणि शैक्षणिक साहित्य-संसाधन निर्मिती व हस्तांतरण सुरु करण्यासाठी लंडन विद्यापीठ, लंडन, यूके येथील विद्यापीठाशी करार करण्यात येणार आहे. मानव्यविज्ञान, भाषा आणि आंतरराष्ट्रीय संबंध आणि सामरिक अध्ययन क्षेत्रातील सह ऑनलाईन पदवी प्रोग्राम, ट्विनींग प्रोग्राम आणि इंटर्नशिपसाठी एसओएएस युनिव्हर्सिटी ऑफ लंडन यांच्याशी करार केला जाणार आहे. त्याच बरोबर सोमरविले कॉलेज ऑक्सफोर्ड विद्यापीठ आणि कॅम्ब्रिज विद्यापीठ यांच्यासोबतही उच्च शिक्षणातील विविध उपक्रम आणि संधींबाबत सामंजस्य करण्यासाठी प्राथमिक स्वरुपातील चर्चा करण्यात आली.
मुंबई विद्यापीठाच्या शिष्टमंडळाच्या वतीने लंडन स्कूल ऑफ इकॉनॉमिक्स येथील कुलगुरू प्रा. लॅरी क्रॅमर, एसओएएस शापूरजी पालनजी इन्स्टिट्यूट ऑफ झोरोस्ट्रियन स्टडीज येथील प्रा. अल्मुट हिंटझे, लंडन विद्यापीठातील प्र- कुलगुरू प्रा. मेरी स्टियास्नी, एसओएएस युनिव्हर्सिटी ऑफ लंडन येथील कुलगुरू प्रा. आदम हबीब, सोमरविले कॉलेज ऑक्सफोर्ड विद्यापीठ येथील नीरज शेट्ये आणि कॅम्ब्रिज विद्यापीठ येथील प्रा. रोझलिंड ओ हॅनलॉन यांच्याशी भेट घेऊन शैक्षणिक सामंजस्यासाठी चर्चा करण्यात आली.
कोट
“राष्ट्रीय शैक्षणिक धोरणाच्या अंमलबजावणीच्या अनुषंगाने उच्च शिक्षणातील प्रगत ज्ञानशाखात सखोल अध्ययन व संशोधन व्हावे यासाठी मुंबई विद्यापीठाने हे महत्वपूर्ण पाऊल उचलले आहे. वैश्विक ज्ञानाच्या देवाणघेवाण प्रक्रियेमुळे विविध देशांतील शिक्षण प्रणालींमध्ये विकसित होत असलेल्या परस्परसंवादाद्वारे विद्यार्थ्यांना या कराराअंतर्गत फायदा होणार असून, यामुळे सर्वोत्कृष्ट शैक्षणिक आणि संशोधन पद्धतींच्या सामायिकरणास प्रोत्साहन मिळू शकेल.”
प्रा. रवींद्र कुलकर्णी, कुलगुरु, मुंबई विद्यापीठ
