घुमर्रा येथील पालक सभेत विद्यार्थ्यांच्या सर्वांगीण विकासासाठी शाळा-पालक-ग्रामस्थांच्या समन्वयाचे आवाहन
गोरेगाव दि.३ सप्टेंबर: जिल्हा परिषद वरिष्ठ प्राथमिक शाळा, घुमर्रा, ता. गोरेगाव येथे आयोजित करण्यात आलेल्या पालक सभेला जिल्हा परिषद अध्यक्ष लायकराम भेंडारकर यांनी उपस्थित राहून विद्यार्थ्यांच्या शैक्षणिक व सर्वांगीण विकासाबाबत मार्गदर्शन केले. विद्यार्थ्यांच्या उज्ज्वल भविष्यासाठी शाळा, पालक आणि ग्रामस्थ यांनी एकत्रितपणे काम करण्याची गरज असून, ‘शाळेचा विकास म्हणजे गावाचा विकास आणि विद्यार्थ्यांचा विकास म्हणजे समाजाच्या उज्ज्वल भविष्याची पायाभरणी’ या भावनेतून सर्वांनी योगदान द्यावे, असे आवाहन त्यांनी यावेळी केले.
कार्यक्रमाची सुरुवात मान्यवरांच्या हस्ते दीपप्रज्वलन करून करण्यात आली. यावेळी शाळेतील शिक्षकवृंद, पालक, विद्यार्थी तसेच गावातील नागरिक मोठ्या संख्येने उपस्थित होते. कार्यक्रमादरम्यान जि.प. अध्यक्ष लायकराम भेंडारकर यांनी उपस्थित पालक, विद्यार्थी आणि ग्रामस्थांशी मनमोकळा संवाद साधला.
यावेळी विद्यार्थ्यांची केवळ शैक्षणिक प्रगती नव्हे, तर त्यांचा सर्वांगीण विकास, व्यक्तिमत्त्व विकास, शिस्त, संस्कार, क्रीडा, कला तसेच विविध कौशल्यांचा विकास याबाबत सविस्तर चर्चा करण्यात आली. विद्यार्थ्यांच्या प्रगतीमध्ये पालकांचा सहभाग अत्यंत महत्त्वाचा असून, पालकांनी आपल्या पाल्यांच्या शिक्षणाकडे नियमित लक्ष द्यावे, शाळेतील विविध उपक्रमांमध्ये सक्रिय सहभाग घ्यावा आणि शिक्षकांशी सातत्याने संवाद साधावा, असे मार्गदर्शन करण्यात आले.
जिल्हा परिषद शाळा ही ग्रामीण भागातील विद्यार्थ्यांच्या शिक्षणाचा महत्त्वपूर्ण आधारस्तंभ आहे. ग्रामीण भागातील विद्यार्थ्यांना दर्जेदार शिक्षण, आवश्यक शैक्षणिक सुविधा आणि विविध उपक्रमांच्या माध्यमातून विकासाच्या संधी उपलब्ध करून देण्यासाठी शिक्षकांसोबतच पालक व ग्रामस्थांची भूमिका महत्त्वपूर्ण आहे. शाळेच्या भौतिक तसेच शैक्षणिक विकासासाठी लोकसहभाग वाढविणे गरजेचे असून, सर्वांच्या सहकार्याने शाळेचा सर्वांगीण विकास साधता येईल, असेही भेंडारकर यांनी नमूद केले.
पालकांच्या सकारात्मक सहभागामुळे विद्यार्थ्यांमध्ये आत्मविश्वास वाढतो, त्यांच्या शैक्षणिक कामगिरीत सुधारणा होते आणि शाळेच्या प्रगतीला चालना मिळते. त्यामुळे पालकांनी केवळ पालक सभेपुरता सहभाग न ठेवता वर्षभर शाळेच्या विविध उपक्रमांमध्ये सहभागी होऊन शिक्षकांना सहकार्य करावे, असे आवाहन यावेळी करण्यात आले.
यावेळी जि.प. अध्यक्ष लायकराम भेंडारकर यांनी घुमर्रा ग्रामपंचायत कार्यालयाला भेट देऊन ग्रामस्थांशी संवाद साधला. गावाच्या सर्वांगीण विकासासाठी ग्रामस्थांनी आपापसातील मतभेद बाजूला ठेवून एकत्रितपणे काम करण्याची गरज असल्याचे त्यांनी सांगितले. गावातील मूलभूत सुविधा, शैक्षणिक विकास तसेच इतर विकासकामांसाठी लोकसहभाग महत्त्वाचा असून, गावाच्या प्रगतीसाठी सर्वांनी एकजुटीने प्रयत्न करावेत, असे आवाहन त्यांनी केले.
गावाचा विकास हा केवळ शासकीय यंत्रणेच्या प्रयत्नांवर अवलंबून नसून, ग्रामस्थांचा सक्रिय सहभाग आणि एकजूट यामुळे विकासकामांना अधिक गती मिळते. त्यामुळे ग्रामपंचायत, लोकप्रतिनिधी, शिक्षक, पालक आणि ग्रामस्थ यांनी समन्वयाने काम केल्यास गावाच्या विकासाला निश्चितच नवी दिशा मिळेल, असेही त्यांनी स्पष्ट केले.
यावेळी कार्यक्रमाला लक्ष्मण भगत सभापती अर्थ व बांधकाम,सशेंद्र भगत जि.प. सदस्य, सविता फुंडे सरपंच, शालिंदर धुर्वे उपसरपंच, संजय भावे, गणविरजी, पो.पा,मोनिका डोंगरे अध्यक्ष शाळा व्यवस्थापन समिती,विशाखा कोल्हे ग्राम सदस्य, एफ. आर. बिसेन सेवानिवृत्त शिक्षक, रामदास चौधरी ग्राम सदस्य, जीतेंद्र पटले ग्राम सदस्य, नेतराम कोल्हे तंटामुक्ती अध्यक्ष, सुनील भालाधर, सागर येळे, सुधाकर ब्राम्हणकर अध्यक्ष शाळा व्यवस्थापन समिती घोटी, पुष्पा पटले ग्राम सदस्य, बागडेजी वनरक्षक,निर्मला भोयर ग्राम सदस्य, येळेजी केंद्रप्रमुख,टेंभरेजी ग्रामविकास अधिकारी, ए. एन. जांभुळकर मुख्याध्यापक यांच्यासह शाळा व्यवस्थापन समितीचे सर्व सदस्य, पालकवर्ग, शिक्षक, विद्यार्थी व ग्रामस्थ मोठ्या संख्येने उपस्थित होते.कार्यक्रमाच्या निमित्ताने शाळा आणि समाज यांच्यातील समन्वय अधिक दृढ करण्याबरोबरच विद्यार्थ्यांच्या उज्ज्वल भविष्यासाठी सामूहिक प्रयत्न करण्याचा सकारात्मक संदेश देण्यात आला.
