चंद्रपूर,दि.7ः- ताडोबा अंधारी व्याघ्र प्रकल्पातील ८0 च्या जवळपास असणारे वाघ व अन्य वन्यजीवांच्या संरक्षणासाठी जागतिक दर्जाचे प्रशिक्षण घेवून ४0 कमांडो कोर झोनमध्ये आजपासून सक्रिय झाले आहे. चित्याप्रमाणे कारवाईसाठी सज्ज असणारे हे जवान तामिळनाडूतील अनुभवी वरिष्ठांकडून प्रशिक्षण घेवून कार्यवाहीस सिध्द झाले आहे. आगरझरी येथे सोमवारी सांयकाळी या प्रशिक्षणाचा समारोप झाला.
आगरझरी येथील प्रशिक्षण संस्थेमध्ये तीन दिवसांचे कमांडो प्रशिक्षण नुकतेच घेण्यात आले. तामिळनाडूमध्ये वन्यजीव संरक्षणाचा दांडगा अनूभव असणार्या दोन वरिष्ठ अधिकार्यांनी ताडोबा येथे येवून हे प्रशिक्षण दिले. वाघांची शिकार करणारे शिकारी, तस्कर, जंगलात चोरी करणारे चोर, अवैध लाकूड तोड आणि परिसरात घुसखोरी करणारे असामाजिक तत्व यांना धडा शिकविण्यासाठी हे कमांडो कार्यरत असणार आहेत.
दूरचित्रवाणीवरील सीआयडी या मालिकेमुळे घराघरात पोहचलेले सुप्रसिध्द चित्रपट अभिनेते शिवाजी साटम यांच्या उपस्थितीत ताडोबाच्या या ४0 कमांडोंचा प्रशस्तीपत्र देऊन सत्कार करण्यात आला. यावेळी ताडोबा अंधारी व्याघ्र प्रकल्पाचे उपसंचालक (कोर) किशोर मानकर, उपसंचालक (बफर) गजेंद्र नरवणे, नवृत्त वरिष्ठ अधिकारी अरुण तिखे, जिल्हा माहिती अधिकारी प्रवीण टाके आदी यावेळी उपस्थित होते.
यावेळी प्रशिक्षणार्थीतर्फे सुरज मेर्शाम, वैशाली जेणेकर, श्रीकृष्ण नागरे, दिलेश्वरी वाढई आदींनी आपले मनोगत व्यक्त केले. प्रसिध्द सिनेअभिनेते शिवाजी साटम यांनी ताडोबा हे चंद्रपूरसाठीच नव्हे, महाराष्ट्रासाठी नव्हे तर देशासाठी महत्त्वाचे पर्यटन स्थळ आहे. वाघाची काळजी घेण्यासाठी वन्यजीवांचा हल्ला सोसणार्या परिवारातील तरुण पुढे येतात आणि जगासाठी वाघ संरक्षित ठेवतात. ही बाब अतिशय महत्त्वपूर्ण आहे. ताडोबावर माझे प्रेम असल्यामुळे मी कायम या ठिकाणी येत राहतो. मात्र मला आवडणार्या वाघांसाठी राज्य शासन विविध प्रकारे प्रयत्न करते. त्यासाठी जवानांना प्रशिक्षित करते. ही बाब आज प्रत्यक्ष बघून समाधान वाटते. खरे हिरो संरक्षणकर्ते जवान आहेत. त्यांना मी सलाम करतो. अशी कृतज्ञता त्यांनी व्यक्त केली.कार्यक्रमाचे प्रास्ताविक किशोर मानकर यांनी केले. यावेळी त्यांनी राज्य शासनामार्फत कोर व बफर भागातील पुनर्वसीत गावासाठी केले जात असलेले प्रयत्न व नागरिकांचा मिळणारा प्रतिसाद कमांडो दलाची आवश्यकता या संदर्भात माहिती दिली. आभार सहा.वनसरंक्षक शंकरराव घुपसे यांनी मानले.
