नवी दिल्ली: ज्येष्ठ समाजसेवक डॉ. प्रकाश आमटे आणि नेपाळमधील सामाजिक कार्यकर्त्या अनुराधा कोईराला यांच्यासह दहा जणांना ‘हार्मनी फाऊंडेशन‘तर्फे सामाजिक न्यायासाठीचा प्रतिष्ठेचा मदर तेरेसा आंतरराष्ट्रीय पुरस्कार जाहीर झाला आहे.
गडचिरोलीमधील हेमलकसासारख्या दुर्गम भागात गेल्या 40 वर्षांपासून आमटे दाम्पत्य ‘लोकबिरादारी‘ प्रकल्पाच्या माध्यमातून आदिवासींच्या उत्थानासाठी कार्यरत आहे. 65 वर्षीय अनुराधा कोईराला यांनी आतापर्यंत मानवी तस्करीच्या जाळ्यातून 12 हजारांहून अधिक महिलांची सुटका केली आहे. भारतामधील आणि नेपाळ-भारत सीमेवर चालणाऱ्या या मानवी तस्करीविरोधात कोईराला गेली दोन दशके लढा देत आहेत.
या दोघांशिवाय, ऐझवाल येथील डॉ. संगथनकिमा यांनाही हा पुरस्कार जाहीर झाला आहे. डॉ. संगथनकिमा यांनी ईशान्य भारतामध्ये व्यसनमुक्तीसाठी प्रयत्न केले आहेत.
