गोंदिया,दि.12ः- विदर्भातील भंडारा व गोंदिया आणि मध्यप्रदेशातील बालाघाट जिल्ह्यात १३ जूनपासून सारस पक्ष्यांची गणना केली जाणार आहे. १९ जूनपर्यंत ही गणना सुरू राहणार आहे.वन विभाग आणि सेवा संस्थेच्या वतीने गणनेचे अभियान राबविले जाणार आहे. १३ जून रोजी भंडारा आणि गोंदिया जिल्ह्यात तर १४ जून रोजी बालाघाट जिल्ह्यात गणना होईल. याशिवाय १५ ते १८ जून दरम्यान इतर आवश्यक ठिकाणी भेटी देऊन ही गणना केली जाईल आणि १९ जून रोजी गणनेचा निकाल जाहीर केला जाईल. गणनेत ६० ते ७० सारस मित्र, शेतकरी आणि सेवा संस्थेचे सदस्य, असे सुमारे ९० लोक सहभागी होणार आहेत. सावन बाहेकर, भरत जसानी, अविजीत परिहार यांच्या मार्गदर्शनात ही गणना करण्यात येत आहे. दरवर्षी पूर्व विदर्भात अशा प्रकारची गणना केली जाते. यंदा करोना प्रादुर्भावाच्या पार्श्वभूमीवर गणना करताना अधिक काळजी घेतली जाणार आहे. गणनेबाबतच्या आराखड्याला नुकत्याच झालेल्या एका बैठकीत अंतिम रूप देण्यात आले आहे.
