सफाई कामगार ते फायरमन क्षेत्रातील महिलांचा ‘मान्विथा कर्मसिध्दी पुरस्काराने’सन्मान

लातूर,दि.०८ः वरिष्ठ पदांवर कार्यरत अधिकाऱ्यांना त्यांच्या विभागाच्या कामगिरीचे श्रेय दिले जाते. मात्र, प्रशासनाच्या उतरंडीत तळाशी असलेल्या कर्मचाऱ्यांच्या कर्तृत्वाची दखल सहसा घेतली जात नाही. त्याचे स्वतंत्रपणे मूल्यमापन होत नाही. असाच अनुभव महिला दिनानिमित्त आयोजित अनेक कार्यक्रमात येतो. नेमकी हीच बाब हेरून, विविध विभागात प्रत्यक्ष फिल्डवर काम करणाऱ्या महिलांच्या कार्याचा गौरव करण्यासाठी लातूरच्या जिल्हाधिकारी वर्षा ठाकूर-घुगे यांच्या संकल्पनेतून जागतिक महिला दिनाच्या पूर्वसंध्येला ‘मान्विथा कर्मसिध्दी पुरस्कार वितरण’ सोहळ्याचे आयोजन करण्यात आले होते. यानिमित्ताने शहरातील स्वच्छता कर्मचारी, फायरमन ते ग्रामीण भागात नागरिकांच्या आरोग्याची काळजी घेणाऱ्या आरोग्य सेविका, आशा कर्मचारी अशा विविध क्षेत्रात काम करणाऱ्या कर्तृत्ववान महिलांना सन्मानित करण्यात आले.