गोंदिया,दि.31 : भाजपसह शिंदेसेनेचाही उमेदवार ठरविण्यासाठी उपमुख्यमंत्री देवेंद्र फडणवीस यांनी यशस्वी केलेली तडजोड, नाना पटोलेंनी भंडारा-गोंदियात दिलेला नवखा उमेदवार,रामटेकमध्ये काँग्रेसमध्ये झालेली बंडखोरी, गडचिरोली चंद्रपूरमध्ये विजय वडेट्टीवारांना करावी लागणारी कसरत, महायुतीचा झेंडा उंचावण्यासाठी प्रफुल्ल पटेलांना करावी लागणारी धडपड, ही या निवडणुकीची वैशिष्ट्ये ठरणार आहेत. थोडक्यात काही मतदार संघाचा घेतलेला थोडक्यात आढावा.
*नागपुरात गडकरी विरुद्ध ठाकरे
* गडचिरोली-चिमुरात खरा सामना भाजप-काँग्रेसमध्ये
* चंद्रपुरातही दुहेरी सामना
२०१९ च्या लोकसभा निवडणुकीत संपूर्ण राज्यात काँग्रेसला विजय देणारा एकमेव चंद्रपूर मतदारसंघ यावेळीही लक्षवेधी आहे. काँग्रेसच्या आमदार प्रतीभा धानोरकर यांची लढत भाजपचे मंत्री सुधीर मुनंगटीवार यांच्याशी आहे. गेल्यावेळी वंचितने तब्बल लाखांवर मतांचे विभाजन घडवूनही दिवंगत बाळू धानोरकर यांचा ४४ हजार ७६३ मतांनी विजय झाला होता. यावेळी वंचितचे राजेश बेले रिंगणात आहेत. भाजप आणि काँग्रेसने ही लढत प्रतिष्ठेची केल्याने चुरस वाढली आहे.काँग्रेस नेते विजय वड्डेटीवाराकरीता हा मतदारसंघ महत्वाचा राहणार आहे,कारण धानोरकर व वड्डेटीवार यांच्यातील मतभेद आणि वड्डेटीवार समर्थकांचे चंद्रपूर गडचिरोली जिल्ह्यातील नेते भाजपमध्ये प्रवेश घेत असल्याने काँग्रेस उमेदवारावर किती प्रभाव पडतो हे बघावे लागणार आहे.मुनगंटीवार विकासाच्या नावावर मत मागत असले तरी त्यांच्याच मतदारसंघात बेरोजगारांची मोठी फौज अनेक वर्षापासून उभी झाली आहे.
-रामटेक मतदारसंघात काँग्रेसच्या उमदेवार रश्मी बर्वे यांचा उमेदवारी अर्ज रद्द झाल्याने त्यांच्या जागी त्यांचे पती श्यामकुमार बर्वे हे महाआघाडीच्या वतीने रिंगणात आहेत. महायुतीमध्ये शिदेसेनेकडे गेलेल्या या मतदारसंघात भाजपच्या पुढाकारातून काँग्रेसचे आमदार राजू पारवे उमेदवार आहेत. माजी मंत्री सुनील केदार यांची कोंडी करण्यासाठी आमच्या आमदाराला फोडले, असा आरोप करीत काँग्रेस जिद्दीने रिंगणात उतरली आहे. बसपाकडून जिल्हाध्यक्ष संदीप मेश्राम, तर वंचित बहुजन आघाडीकडून शंकर चहांदे रिंगणात आहेत. काँग्रेसचे किशोर गजभिये यांनी केदार यांनी आपला विरोध केल्याचा राग मनात ठेवून बंडखोरी करून अर्ज कायम ठेवला आहे.
