अर्जुनी मोर.दि.१०ः-अर्जुनी मोरगाव पंचायत समिती सभापती पदाचे आरक्षण अनुसूचित जाती महिलांसाठी राखीव निघाल्याने अनुसूचित जाती प्रवर्गातून गोठणगाव गणातून निवडून आलेल्या आम्रपाली डोंगरवार हा एकमेव असल्याने त्यांची बिनविरोध सभापती पदी निवड होणार आहे.सभापती उपसभापती पदाची निवडणूक येत्या 20 जानेवारीला होणार असून पिठाशीन अधिकारी म्हणून उपविभागीय अधिकारी वरुणकुमार शहारे राहणार आहेत.
अर्जुनी मोरगाव पंचायत समितीमध्ये 14 सदस्य असून यामध्ये वंचित एक, भाजपा सात, राष्ट्रवादी काँग्रेस दोन, काँग्रेस चार, असे पक्षीय बलाबल आहे. यापूर्वी अडीच वर्षासाठी अनुसूचित जमाती महिला आरक्षणात भाजपाचे सहकार्याने वंचितच्या सविता कोडापे सभापती बनल्या होत्या. आता अडीच वर्षाचा कालावधीसाठी आज तारीख 10 जानेवारी रोजी सभापती पदाची सोडत काढण्यात आली असून अर्जुनी मोरगाव पंचायत समिती सभापतीसाठी अनुसूचित जाती महिला आरक्षण निघाला आहे. त्यामुळे गोठणगाव पंचायत समिती गणातून राष्ट्रवादी काँग्रेस कडून निवडून आलेल्या आम्रपाली डोंगरवार हा एकमेव अनुसूचित जाती महिला सदस्य असल्याने आपसूकच सभापती पदाची माळ त्यांचे गळ्यात पडली आहे. राष्ट्रवादीच्या आम्रपाली डोंगरवार या गोंदिया जिल्हा परिषदचे उपाध्यक्ष व गोठणगाव क्षेत्राचे जिल्हा परिषद सदस्य यशवंत गणवीर यांच्या निकटवर्तीय असल्याचे समजते. आता 20 जानेवारीला सभापती व उपसभापती पदासाठी निवड होणार असून उपसभापती कोण होणार या चर्चांना उधान आले आहे. सध्या महायुती असून उपसभापती पदावर भाजपचा सदस्य निवडल्या जाणार असून भाजपकडे पाच पुरुष व दोन महिला सदस्य आहेत. त्यामुळे नूतन सोनवाणे, नाजूक कुंभरे, संदीप कापगते यापैकी एकाची उपसभापती पदी वर्णी लागु शकते ? उपसभापती पदासाठी मोठी रस्सी खेच होणार असे चित्र आतापासूनच दिसायला लागले आहेत.
