- क्रीडा संकुल समिती बैठक
- सुविधांचा घेतला आढावा
गोंदिया, दि.2३ : जिल्हा क्रीडा संकुलात येणारे खेळाडू व नागरिकांना पुरेशा प्रमाणात क्रीडा सुविधा असणे आवश्यक असून त्या निर्माण करण्यावर भर देण्यात यावा अशा सूचना जिल्हाधिकारी तथा अध्यक्ष जिल्हा क्रीडा संकुल समिती गोंदिया प्रजित नायर यांनी केल्या.
जिल्हाधिकारी यांच्या अध्यक्षतेखाली आज जिल्हा क्रीडा संकुल समितीची बैठक आयोजित करण्यात आली होती, त्यावेळी ते बोलत होते. कार्यकारी अभियंता सार्वजनिक बांधकाम नरेश लभाने, उपमुख्य कार्यकारी अधिकारी गोविंद खामकर, जिल्हा माहिती अधिकारी रवी गिते, नगर परिषद मुख्याधिकारी सुनील बल्लाळ व जिल्हा क्रीडा अधिकारी नंदा खुरपुडे यावेळी उपस्थित होते.
या बैठकीत मागील सभेच्या इतिवृत्तास व जिल्हा क्रीडा संकुल येथील जमा खर्चास समितीने मान्यता दिली. यासोबतच विविध विषयांवर चर्चा करण्यात आली. क्रीडा संकुलाचे उत्पन्न स्रोत कमी असून त्या तुलनेत खर्च अधिक असल्याचे नमूद करून जिल्हाधिकारी म्हणाले की, आधुनिक सुविधा उपलब्ध करून देण्याबरोबरच उत्पन्नाचे स्रोत निर्माण करण्यावर भर देण्यात यावा, जेणेकरून खेळाडूंना आधुनिक सुविधा उपलब्ध करून देणे सोईचे होईल. क्रीडा संकुल परिसरात येणारे खेळाडू व नागरिक यांच्यासाठी संकुल परिसरातच कॅफेटेरिया असावा अशी संकल्पना पुढे आली असता संकुल परिसरात असलेल्या दोन वसतिगृहाच्या दरम्यान असलेल्या मोकळ्या जागेत कॅफेटेरिया व कॅन्टीन तयार करण्यास समितीने सहमती दर्शविली. संकुलात असलेल्या मुलींच्या वसतिगृह इमारतीत असलेल्या हॉलची दुरुस्ती करण्यावरही यावेळी चर्चा झाली.
क्रीडा संकुलात उत्तम जलतरण तलाव असून या तलावाची मोठ्या प्रमाणात दुरुस्ती करणे आवश्यक असल्याचे जिल्हा क्रीडा अधिकारी नंदा खुरपुडे यांनी समितीच्या निदर्शनास आणून दिले. निधीच्या उपलब्धतेनुसार प्राधान्य क्रमाने दुरुस्ती करण्यावर समितीचे एकमत झाले. या कामाचा आढावा घेऊन टप्प्या-टप्प्याने ती कामे करण्याबाबत जिल्हाधिकाऱ्यांनी जिल्हा क्रीडा अधिकारी यांना सूचना केल्या. क्रीडा संकुलात असलेल्या पॉलिग्रास फुटबॉल मैदानाचे बांधकाम सप्टेंबरपूर्वी करण्याचे निर्देशही जिल्हाधिकाऱ्यांनी दिले. क्रीडांगण अनुदान योजनेतून संकुलात प्रसाधनगृह तयार करण्यास समितीने मान्यता दिली.
