बकिंगहॅम पॅलेसने महाराणी एलिझाबेथ द्वितीय यांच्या निधनाची घोषणा केली आहे. एलिझाबेथ ही ब्रिटनची सर्वात जास्त काळ सत्ता सांभाळणारी सम्राज्ञी होती. एलिझाबेथ यांचे आज दुपारी बालमोरल येथे निधन झाले. त्या 96 वर्षांच्या होत्या. त्या सत्तर वर्षे ब्रिटनच्या सम्राज्ञी होत्या.
डॉक्टरांच्या देखरेखीखाली होत्या राणी एलिझाबेथ
गुरुवारी दुपारी त्यांच्या प्रकृती अस्‍वथ असल्‍याची बातमी आली होती. त्यानंतर त्या डॉक्टरांच्या देखरेखीखाली होत्या. राजघराण्याने सांगितले होते की, राणी episodic mobility या आजाराने ग्रस्‍त होत्या. या आजारात रुग्णाला उभे राहण्यास व चालण्यास त्रास होतो. 19 फेब्रुवारी 2022 रोजी त्यांना कोरोनाची लागण झाली होती.
स्कॉटलंडमधील बालमोरल कॅसल येथे त्यांनी अखेरचा श्वास घेतला. राणीचे कुटुंबीय बालमोरल वाड्यात पोहोचले आहेत. बीबीसीच्या म्हणण्यानुसार, प्रिन्स विल्यम, अँड्र्यू आणि एडवर्ड स्कॉटलंडमधील अ‌ॅबरडीन विमानतळावर उतरले आणि बालमोरल कॅसलकडे निघाले. ड्यूक ऑफ केंब्रिज, ड्यूक ऑफ यॉर्क देखील सोबत आहेत.
आजारपणामुळे राणी बालमोरल पॅलेसमध्ये राहत होती. या राजवाड्यातून त्या सर्व कार्यालयीन कामे करत होत्या. ब्रिटनच्या नवीन पंतप्रधान लिझ ट्रस यांनी 6 सप्टेंबर रोजी येथे येऊन त्यांची भेट घेतली आणि शपथ घेतली होती.
राजघराणे आणि ब्रिटनमध्ये शोककळा
राणी एलिझाबेथचे पती प्रिन्स फिलिप यांचे 9 एप्रिल 2021 रोजी निधन झाले. आज दिनांक 8 सप्टेंबर 2022 रोजी राणीचे निधन झाले. राणीला चार मुले आहेत. प्रिन्स चार्ल्स, राजकुमारी ऍनी, अँड्र्यू आणि एडवर्ड, ज्यांच्यापासून त्यांना आठ नातवंडे आणि 12 पणतू आहेत. आता प्रिन्स विल्यम वयाच्या 40 व्या वर्षी ब्रिटीश सिंहासनाचे वारसदार बनले आहेत. त्याचे वडील प्रिन्स चार्ल्स आता राजा बनले आहेत.
राजघराण्यावर आता अधिकृतपणे शोक व्यक्त केला जाईल. सर्व अधिकृत कार्यक्रम रद्द केले जातील आणि शाही राजवाडे आणि घरांवर युनियन जॅक अर्ध्या मास्टवर फडकवला जाईल. याशिवाय ब्रिटनच्या सर्व बाह्य चौक्या आणि लष्करी तळांवरही अर्ध्‍यावर ध्वज फडकवला जाईल.
पंतप्रधान मोदींनी व्यक्त केले दुःख
पंतप्रधान मोदी यांनी आपल्या शोकसंदेशात म्‍हटले की, राणी एलिझाबेथ ह्या दिग्गज शासक होत्या. एलिझाबेथ द्वितीय आपल्या काळातील महान शासक म्हणून स्मरणात राहतील. त्यांच्या दु:खाच्या काळात त्यांचे कुटुंब आणि ब्रिटनच्या लोकांसोबत माझ्या संवेदना आहेत.
त्यांनी सांगितले की, मी राणीला 2015 आणि 2018 मध्ये यूके दौऱ्यात भेटलो. एका सभेत त्यांनी मला एक रुमाल दाखवला होता, तो रुमाला राणींना महात्मा गांधींनी त्यांच्या लग्नात भेट म्हणून दिला होता.
जागतिक नेत्यांनी व्यक्त केले दु:ख
फ्रान्सचे राष्ट्राध्यक्ष इमॅन्युएल मॅक्रॉन म्हणाले की, “राणीने ब्रिटीशांना ७० वर्षे स्थिरता दिली. राणीने लोकांवर एक अमिट छाप सोडली आहे, जी लोक नेहमी लक्षात ठेवतील.”
कॅनडाचे पंतप्रधान जस्टिन ट्रूडो म्हणाले की, ‘राणी एलिझाबेथने कॅनडातील लोकांसाठी जे केले ते आम्ही कधीही विसरणार नाही.’
इस्राइलचे पंतप्रधान यार लॅपिड म्हणाले की, ‘राणी एलिझाबेथ द्वितीय यांचे नेतृत्व आणि सेवा जग नेहमीच लक्षात ठेवेल.’
लंडनच्या बकिंघम पॅलेसमध्ये होणारी गार्ड चेजिंग सेरेमनी रद्द करण्यात आली आहे. सेरेमनीवेळी ज्या ठिकाणी पर्यटक गोळा होतात, त्या ठिकाणी एक बोर्ड लावण्यात आला आहे.
तत्पूर्वी, महाराणींच्या प्रीव्ही काउंसिल म्हणजे गुप्त माहितीशी संबंधित मंत्रिमंडळाची व्हर्चुअल बैठकही रद्द करण्यात आली होती.
महाराणींच्या आयुष्याशी संबंधित महत्वाची छायाचित्रे…
