■ देवरी नगरपंचायत येथील प्रकरण.
देवरी,दि.०७: देवरी नगरपंचायतीला कोणी मुख्याधिकारी देता का? असे म्हणण्याची वेळ पदाधिकारी व नगरसेवकांवर आली आहे. या ठिकाणी कायमस्वरूपी मुख्याधिकारी दयावा, अशी मागणी देवरी येथील बुध्दजीवी नागरिकांनी केली आहे. एवढेच नव्हे तर मुख्याधिकारी यांचे अभावी शहराचा विकास खुंटला असून नगरपंचायतीचे पदाधिकारी व नगरसेवक बेमुदत आंदोलन करतील की काय? असा ही समज देवरी शहरातील नागरिकांत झाला आहे.
‘माझी वसुंधरा अभियान’ यात नाव लौकिक पावलेल्या देवरी नगरपंचायतीत अनेक महिन्यांपासून मुख्याधिकार्‍यांसह अनेक पदे रिक्त आहेत. त्यामुळे नगरपंचायतीच्या कामकाजावर विपरित परिणाम झाल्याचे दिसून येत आहे.
देवरी नगरपंचायतीत मुख्याधिकारी, शहर अभियंता, पाणीपुरवठा अभियंता, लेखापाल, लेखापरीक्षक, गट क, श्रेणी ब, नगररचना सहायक अभियंता, कर निरीक्षक,सहायक करनिरीक्षक अशी अनेक पदे प्रभारी प्रतिनियुक्तीवर आहेत.
वरील सर्व पदावर अधिकारी यांची देवरी नगरपंचायतीमध्ये कायमस्वरूपी नियुक्ती होणे गरजेचे असल्याचे शहरातील नागरिकांचे म्हणणे आहे.
नगरपंचायतीत प्रतिनियुक्तीवरील नियुक्त आणि अनेक पदे रिक्त असल्यामुळे देवरी शहरातील नागरिकांची कामे प्रलंबित आहेत. कामाचा आराखडा वेळेवर न होणे, बिले अदा न होणे, पंतप्रधान आवास योजना, रमाई आवास योजना, वैयक्तिक शौचालय प्रकरणे, बांधकाम परवाने, नवीन जागेच्या नोंदी, पाणीयोजना, विद्युत विभाग व नगरसेवकांच्या प्रभागातील कामे खोळंबली आहेत. यासंदर्भात नगरविकास विभाग व जिल्हाधिकारी कार्यालयास अगोदर बर्‍याचदा पत्रव्यवहार करून ही कायमस्वरूपी अधिकार्‍यांच्या नियुक्त्या झाल्या नाहीत. ही पदे रिक्त राहिली. त्यामुळे सर्व पदाधिकारी वेळेनुसार जिल्हाधिकारी कार्यालया समोर उपोषणास बसतील की काय? यावर नगरपंचायतचे पदाधिकारी व नगरसेवक यांच्यात कुजबुज सुरू असल्याची चर्चा शहरातील नागरीकामध्ये आहे.
