मुंबई- वांद्रे (पूर्व) पोटनिवडणुकीत शिवसेनेच्या उमेदवार तृप्ती सावंत यांनी काँग्रेसचे उमेदवार नारायण राणे यांचा 19 हजार 8 मतांनी पराभव करीत त्यांना धूळ चारली आहे. शिवसेनेने नारायण राणेंवर नेम धरल्यानेच त्यांचा पुन्हा गेम झाल्याचे स्पष्ट झाले आहे. शिवसेनेच्या तृप्ती सावंत यांना 52 हजार 711 मते मिळाली आहेत. तर, नारायण राणेंना 33 हजार 703 मते मिळाली. एमआयएमचे उमेदवार राजा रहेबर खान यांना केवळ 15 हजार 50 मते मिळाली व ते तिस-या क्रमांकावर फेकले गेले.
आज सकाळी 8 वाजता वांद्रे पूर्वच्या समाज मंदिर सभागृहात मतमोजणी सुरू झाली. मात्र तृप्ती सावंत यांनी पहिल्या फेरीपासूनच आघाडी घेत राणेंना पिछाडीवर ढकलले होते. राणेंची ही पिछाडी कायम राहिली व उत्तरोत्तर फेरीत ती वाढतच गेली. अखेर तृप्ती सावंत यांनी राणेंचा 19 हजारांहून अधिक मतांनी दारूण पराभव केला.
