मुंबई,दि.23ः मुख्यमंत्री उद्धव ठाकरे पुन्हा एकदा अयोध्येला जाणार आहेत. येत्या ७ मार्च रोजी उद्धव ठाकरे शिवसैनिकांसोबत अयोध्येला जाणार असून प्रभू रामचंद्राचे दर्शन घेणार आहेत, अशी माहिती शिवसेनेचे खासदार संजय राऊत यांनी ट्विटरद्वारे दिली.
शिवसेना खासदार संजय राऊत यांनी पुन्हा ट्विट करत मुख्यमंत्री उद्धव ठाकरे यांच्या अयोध्या दौर्याची सविस्तर माहिती दिली आहे. येत्या ७ मार्च रोजी उद्धव ठाकरे असंख्य शिवसैनिकांसह अयोध्येला जाणार आहेत. ७ मार्च रोजी अयोध्येत दुपारी श्रीरामाचे दर्शन घेतील. त्यानंतर संध्याकाळी शरयू नदीच्या तीरावर महाआरती करतील. त्यामुळे या ऐतिहासिक सोहळ्यात सामील व्हा, असे आवाहनही राऊत यांनी केले आहे. कालच मुख्यमंत्री ठाकरे आणि पर्यावरण मंत्री आदित्य ठाकरे यांनी पंतप्रधान नरेंद्र मोदी, भाजपचे ज्येष्ठ नेते लालकृष्ण अडवाणी आणि काँग्रेसच्या हंगामी अध्यक्षा सोनिया गांधी यांची भेट घेतली होती. त्यानंतर शनिवारी राऊत यांनी लगेचच ठाकरे यांच्या अयोध्या दौर्याचे ट्विट करून भाजपला धक्का दिला आहे. त्यामुळे ठाकरे यांच्या अयोध्या दौर्याकडे सर्वांचेच लक्ष लागले आहे.
शुक्रवारी शिवसेनेचे मुखपत्र असलेल्या दैनिक ‘सामना’तून राम मंदिराच्या मुद्यावरून भाजपला कानपिचक्या देण्यात आल्या होत्या. राम मंदिराचे भूमिपूजन पंतप्रधान नरेंद्र मोदी यांच्या हस्ते व्हावे. त्याला कुणाचीच हरकत नाही. पण राम मंदिराच्या भूमिपूजन सोहळ्याला सोनिया गांधी, राष्ट्रवादीचे अध्यक्ष शरद पवार, तृणमूल नेत्या ममता बॅनर्जी, बिहारचे मुख्यमंत्री नितीश कुमार आणि सपा नेते मुलायमसिंह यादव यांनाही बोलावण्यात यावं, असा सल्ला शिवसेनेनं भाजपला दिला होता. तसेच राम मंदिर ट्रस्टमध्ये शिवसेना आणि विश्व हिंदू परिषदेच्या नेत्यांना डावलण्यात आल्याबद्दल या अग्रलेखातून अप्रत्यक्ष टीकाही करण्यात आली होती. या पार्श्वभूमीवर उद्धव ठाकरे यांच्या या दौर्याला विशेष महत्त्व आलं आहे.
