अर्जुनी-मोरगाव : शहरात सिमेंट रस्ते आणि गटार लाईनचे बांधकाम सुरू आहे. निर्माणधीन बांधकामाच्या निवेदीतील संभ्रमामुळे नागरिकांमध्ये असंतोष आहे. शहरातील शिवनारायण पालीवाल ते अर्बन बँक चौक दरम्यान होणाऱ्या सिमेंट रस्ता आणि बंद गटारांचे चेंबरची उंची वाढवू नका, या मागणीचे निवेदन शहरवासीयांनी आज प्रशासकीय अधिकारी डॉ.अमोल जाधव यांना दिले. निवेदितील संभ्रम दूर करा आणि बांधकामाचा शहरवासीयांना त्रास होणार नाही याची दक्षता घेऊन विकासकामे करा अन्यथा आंदोलन उभारू, असा इशारा देण्यात आला आहे.
शहरात नगरपंचायत अंतर्गत वैशिष्ट्यपूर्ण योजनेतून पाच कोटी लक्ष रुपयांचे विकास कामे सुरू आहेत. बंद गटारे आणि सिमेंट रस्ते यांचा विकास कामात समावेश आहे. रेल्वे फाटक ते अर्बन बँक चौक दरम्यान सिमेंट रस्ता मंजूर आहे. या रस्त्याचे काम जुन्या रस्त्याचे खोदकाम करून होणार आहे. मात्र पालीवाल ते अर्बन बँक चौक या रस्त्याचे खोदकाम न करता जुन्या रस्त्यावर सिमेंट रस्ता बांधकाम होणार आहे. निविदेमध्ये अशी तरतूद असल्याचा संभ्रम नागरिकांमध्ये आहे.
