दोघांना अटक :आमदारांवरील हल्ला

गोंदिया : आमदार गोपालदास अग्रवाल यांच्यावरील हल्ल्याच्या प्रकरणात पोलिसांनी शिव शर्मा यांच्या दोन साथीदारांना बुधवारी (दि.१३) रात्री ९.५६ वाजता अटक केली आहे. अटक करण्यात आलेल्यांचे नाव अनिमेश उर्फ राज लक्ष्मीनारायण दुबे (२२,रा.गजानन कॉलनी) व गजेंद्र रामचरण साते (२१,रा.मरारटोली) असे आहे.अटक करण्यात आलेल्या अनिमेश दुबे व गजेंद्र साते या दोघांना पोलिसांनी गुरूवारी (दि.१४) न्यायालयात हजर केले. यात न्यायालयाने दोघांना येत्या २५ तारखेपर्यंत पोलीस कोठडी सुनावली आहे. विशेष म्हणजे १२ दिवसांची पोलीस कोठडी सहाजीक न्यायालय सुनावत नसते.
पोलिसांनी दिलेल्या माहितीनुसार, घटनेच्या दिवशी शनिवारी (दि.९) शिव शर्मा व राहूल श्रीवास तिरोडा रोड वरील अशोका गार्डन रेस्टॉरेंट मध्ये दारू पीत होते. दरम्यान राहूलने अनिमेशला फोन करून बोलाविले. यावर अनिमेश हा त्याचा मित्र गजेंदला घेऊन तेथे पोहोचला. सुमारे ६.३0 वाजतादरम्यान चौघे तट रचून बारमधून बाहेर आले. बाहेर आल्यावर आमदार अग्रवाल यांना टपका देंगे अशी बोलचाल करीत असताना त्यांना बाहेर टपरीवर उभ्या एका इसमाने ऐकले होते.
तेथून चौघे हॉटेलात गेले व यातील गजेंद्र हा बाहेर गेटवरच थांबला. तर शिव शर्मा व राहूल श्रीवास तसेच अनिमेश हा आपापल्या बुलेटने हॉटेलाच्या आत गेले. शिव शर्मा व राहूल श्रीवास दोघे आत गेले व अनिमेश मागून हॉटेलात शिरला. तसेच आत मारहाण केल्यानंतर अनिमेशने शिव शर्माव राहूल श्रीवास यांना बालाघाट पर्यंत सोडले. एकंदर आमदार अग्रवाल यांच्यावरील हल्ल्याचा कट रचण्यात या दोघांचाही हात असल्याने पोलिसांनी दोघांना बुधवारी रात्री अटक केली. प्रकरणाचा तपास पोलीस निरीक्षक बाळासाहेब पवार यांच्या मार्गदर्शनात सहायक पोलीस निरीक्षक सत्यजीत ताईतवाले करीत आहेत