गोंदिया:– चालू आर्थिक वर्ष संपायला आता फक्त तीन दिवस उरले आहेत. या तीन दिवसांत महावितरणने चालू व थकीत वीजबिलांची वसुली जोमाने सुरू केली आहे. घरगुती व व्यावसायिक ग्राहक तसेच शासकीय कार्यालयां कडून ही थकीत वीज बिलांच्या वसुली साठी कठोर कारवाई करण्यात आली आहे.शहरातील जयस्तंभ चौकात असलेल्या नवीन प्रशासकीय इमारतीचे थकबाकीचे बिल न भरल्याने महावितरण ने बुधवार २६ मार्च रोजी प्रशासकीय इमारतीचे वीज पुरवठा खंडीत केला.महावितरणच्या माहितीनुसार प्रशासकीय इमारतीवर सुमारे २.६७ लाख रुपयांहून अधिक वीज बिल थकबाकी असल्याने ही कारवाई करण्यात आली आहे.
संबंधित अधिकाऱ्यांच्या मागणीवरून कार्यालयाच्या इमारतीच्या काही भागाचा वीजपुरवठा सुरू करण्यात आले.तर बाह्य क्षेत्राला होणारा पुरवठा खंडित करण्यात आला आहे. त्यामुळे या चार मजली इमारतीतील लिफ्ट बंद पडल्याने सर्वाधिक फटका दिव्यांग व वयोवृध्दांना बसला आहे.या इमारतीत दोन लिफ्ट असून त्याद्वारे अधिकारी, कर्मचारी तसेच सर्वसामान्य नागरिक विविध कार्यालयात जातात. मात्र बाहेरील भागातील वीजपुरवठा खंडित झाल्याने त्याचा परिणाम लिफ्ट तसेच पाणीपुरवठा व्यवस्थेवर झाला असून येथे येणाऱ्या नागरिकांना प्रचंड त्रास सहन करावा लागत आहे.
या प्रशासकीय इमारतीमध्ये उपविभागीय अधिकारी कार्यालय, दुय्यम निबंधक कार्यालय,महिला बालविकास कार्यालय,पणन कार्यालय,अन्न व नागरी पुरवठा विभाग कार्यालय,मत्स्यव्यवसाय विभाग,ग्रंथालय विभाग,क्षयरोग कार्यालय,कामगार कार्यालय,जिल्हा उपनिबंधक कार्यालय, जिल्हा अधीक्षक कृषी अधिकारी कार्यालय, जिल्हा माहिती अधिकारी कार्यालय,अन्न व औषध कार्यालय यांसह एकूण ३२ असे शासकीय कार्यालये एकाच छताखाली आहेत. अशा परिस्थितीत दररोज हजारो नागरिक आपापल्या कामांसाठी येथे येत असतात. पुरवठा खंडित करण्यापूर्वी वीज विभागाने थकबाकीदार वीजबिल भरण्याची सूचना संबंधित अधिकाऱ्यांना केली होती. त्यानंतर काही रक्कम अदा करण्यात आली, मात्र थकीत रक्कम न भरल्याने ही कारवाई करण्यात आली आहे.
प्रशासकीय इमारतीत विविध विभागांचे कार्यालये असून संबधित विभागप्रमुखांना वारंवार सूचना देऊनही अनेक कार्यालयांची वीज बिले काही महिन्यांपासून भरलेली नाहीत.सध्या वीजपुरवठा केवळ बाह्य भागात खंडित करण्यात आला आहे. कार्यालयीन कामकाज सध्या सुरळीत सुरू आहे. याबाबत संबंधित वरिष्ठ अधिकाऱ्यांना कळवून पुढील कार्यवाही केली जाईल.आज सर्व विभाग प्रमुखांची तातडीची बैठक बोलावून शेवटची सूचना दिली गेली.-चंद्रभान खंडाईत, उपविभागीय अधिकारी, गोंदिया
