देह व्यापाराच्या अड्ड्यावर सापडली अल्पवयीन मुलगी

नागपूर ,दि.22: गुन्हे शाखा पोलिसांनी एका अल्पवयीन मुलीकडून देह व्यापार करवून घेणाऱ्या तीन आरोपींना पकडले.पोलिसांना वैशालीनगर येथील नासुप्रच्या मैदानाजवळील एका घरात देह व्यापार चालत असल्याची माहिती मिळाली. बुधवारी सायंकाळी पोलिसांनी डमी ग्राहक पाठवला. देह व्यापार सुरु असल्याची खात्री पटल्यावर पोलिसांनी धाड टाकली. या अड्ड्याची प्रमुख नीलेश अंतू कुडकी आणि त्याची नातेवाईक सारिका बच्चू कुडकी यांना अटक केली. तसेच दोघांनाही ग्राहक उपलब्ध करून देणाऱ्या लालचंद खरपत यादव यालाही पकडले. 
यादव हा नारळ पाणी विक्रीचा व्यवसाय करतो. नीलेश व सारिका घर भाड्याने घेऊन ग्राहकांना जागा उपलब्ध करून देत होते. दोघेही झारखंडचे राहणारे आहेत. त्यांच्याजवळ एक अल्पवयीन मुलगी सुद्धा सापडली. आरोपींच्या विरुद्ध पीटा अंतर्गत गुन्हा दाखल करण्यात आला.निरीक्षक पंडित सोनवणे यांच्या मार्गदर्शनात हवालदार गोपाल वैद्य, नायक शिपाई मनोज सिंह चव्हाण, अजय ठाकूर प्रफुल्ल बोंद्रे यांनी ही कारवाई केली.