गोरेगाव,दि.०३ः तालुक्यातील मुंडीपार ग्रामपंचायत अंतर्गत येत असलेल्या वार्ड क्र. 2 मध्ये आखरटोली येथे कोहमारा रोड ते ममताताई धामगाये यांच्या घरापर्यंत सिमेंट रस्ता कामाचे भूमिपूजन जिल्हा परिषदेचे अर्थ व बांधकाम समिती सभापती डॉ.लक्ष्मण भगत यांच्या हस्ते करण्यात आले.
या कार्यक्रमास मुंडीपार ग्रामपंचायतीच्या सरपंच सौ. प्रेमलता ताई राऊत, ग्रामपंचायत सदस्य चंद्रशेखर शहारे,राजाभाई खान ग्रामपंचायत सदस्य, प्रलय धामगाये तसेच रोहित पांडे, सुनील वाघाडे, अजय नेवारे, शिवा बिसेन, राहुल राऊत, राजु भोयर व इतर मान्यवर मोठ्या संख्येने उपस्थित होते.
यावेळी परिसरातील नागरिकांनी सिमेंट रस्त्याच्या कामासाठी समाधान व्यक्त केले असून लोकवस्तीतील नागरी मूलभूत सुविधा उपलब्ध करून देण्याच्या दृष्टिकोनातून हे पाऊल महत्त्वाचे असल्याचे डॉ. भगत यांनी सांगितले.कार्यक्रमाचे आयोजन यशस्वीपणे पार पडले असून स्थानिक नागरिकांत आनंदाचे वातावरण आहे.

सिदेंवाही तालुक्यातील विकास कामाची पाहणी

चंद्रपूर ,दिनांक 3 जुलै 2025 – चंद्रपूर जिल्हा परिषदचे मुख्य कार्यकारी अधिकारी पुलकित सिंह यांनी नुकताच सिदेंवाही तालुक्याचा दौरा केला असून, सिदेंवाही तालुक्यातील विविध विकास कामांना भेटी देऊन, पाहणी केली आहे. या भेटी दरम्यान गावातील विकास कामे गतीने निर्माण करा. कामात गती आणा असे सूचना यावेळी मुख्य कार्यकारी अधिकारी पुलकीत सिंह यांनी केल्या ‌.

सर्वप्रथम सिंदेंवाही पंचायत समितीमध्ये सर्व विभागाचा आढावा घेण्यात आला यामध्ये कामात पारदर्शकता ठेवून कामे करा. सर्व विकासकामे वेळेत पूर्ण करा .अशा सूचनाही पुलकित सिंह यांनी दिली आहे. यावेळी पुलकीत सिंह यांनी सिंदेंवाही तालुक्यातील काही गावातील विकास कामांची पाहणी केली . यावेळी पेडगाव या गावात व्हिजिट देऊन, गावातील शाळा व अंगणवाडी , मोहाडी येथील प्राथमिक आरोग्य केंद्र, जामसाळा ग्रामपंचायत ला भेट देऊन ग्रामपंचायतच्या कामकाजाची विचारणा केली. नवरगाव येथील नव्याने तयार झालेले घनकचरा व्यवस्थापन प्रकल्पची पाहणी करून, गावातील कचऱ्याचे  वर्गीकरण करून, सर्व प्रकारचा कचरा घनकचरा व्यवस्थापन प्रकल्पात रोज आणावा .गावातील कचरा रोज गोळा करावा .अशा सूचना केल्या. यासोबतच मामा तलाव दुरुस्तीच्या कामाची पाहणी करून यंत्रणेला योग्य ते निर्देश दिले . यावेळी पंचायत समिती सिंदेंवाहीचे गटविकास अधिकारी आत्मज मोरे तथा विविध विभागाचे अधिकारी कर्मचारी उपस्थित होते.

गोंदिया,दि.०३ः- जिल्हा हिवताप अधिकारी डॉ.विनोद चव्हाण यांनी गोरेगाव तालुक्यातील कुर्हाडी प्राथमिक आरोग्य केंद्र अंतर्गत उपकेंद्र पिंडकेपार येथील जांभुळपाणी गावाला भेट देवुन कार्यक्षेत्रात किटकजन्य कार्यक्रमाची होत असलेल्या कामाची पाहणी केली.

जाभुंळपाणी गावात दिवटे परिवारातील एकच घरातील तीन लोकांना हिवतापाची लागण झाल्याने आरोग्य विभागामार्फत त्या गावात हिवतापविरोधी प्रतिबंधात्मक कार्यवाही सुरु करण्यात आली आहे.सदर गावात सुरु असलेल्या किटकजन्य कार्यक्रमाची पाहणी करण्याकरीता जिल्हा हिवताप अधिकारी डॉ.विनोद चव्हाण यांनी थेट जांभुळपाणी गावातील  दिवटे परिवाराच्या घराला भेट दिली.यावेळी हिवताप दुषित तीनही लोकांची प्रकृतीची विचारपुस करुन दिल्या जात असलेल्या औषधोपचाराची माहिती जाणुन किटकजन्य कार्यक्रमाची पाहणी केली.गावात आशा सेविका व आरोग्य कर्मचार्यामार्फत ताप रुग्ण व कंटेनर शोध मोहिमेची माहीती जाणुन घेतली.

जांभुळपाणी गावात जैवशास्त्रज्ञ अनिल चोरवाडे यांचे मार्फत मलेरिया पसरवणाऱ्या डासांची घनता तपासण्यात येत होती.डॉ.चव्हाण यांनी त्याबाबतची सुद्धा माहीती जाणुन घेतली.यावेळी अनिल चोरवाडे यांनी हिवतापाला कारणीभुत असणारी डास प्रजाती अ‍ॅनाफिलीस नळकांडी मध्ये दाखविली.गावात प्रतिबंधात्मक उपाययोजना सुरु होती त्यात प्रामुख्याने जलद ताप सर्वेक्षण,कंटेनर सर्वेक्षण,किटकशास्त्रीय सर्वेक्षण,डि-लार्वा कार्यवाही प्राथमिक आरोग्य केंद्र कुर्हाडीच्या वतीने सुरु होती.सदर पथकामध्ये किटक समारक जाईभाई,आरोग्य सहाय्यक रवि कटरे,आरोग्य सहायिका मालती भराडे,आरोग्य सेवक डी.एस.लाडे,एच.एम.कटरे,किशोरे सुरजजोशी,जगदिश उके,धिरज माहोरे तसेच आरोग्य सेविका एल.डी.पटले,एस.के.पटले, एम.एम.बिलवणे,आय.वाय.रहांगडाले आशा सेविका चंपा रहांगडाले यांचा समावेश होता.

भेटी दरम्यान डॉ.चव्हाण यांचे सोबत जैवशास्त्रज्ञ अनिल चोरवाडे,तालुका पर्यवेक्षक रवि पटले,राजु मेश्राम, आरोग्य सहाय्यक कमल डोंगरे उपस्थित होते.

गोंदिया,दि.०३: महायुती सरकारने धानाला बोनस देण्याचे आश्वासन दिले होते. मात्र, खरीप हंगाम सुरू झाला तरीही शेतकऱ्यांच्या बँक खात्यात बोनस जमा करण्यात आला नाही. महाराष्ट्र किसान सभा गोंदिया जिल्ह्याच्या वतीने जिल्हाधिकाऱ्यांना दिलेल्या निवेदनातून तीन दिवसांत बोनस शेतकऱ्यांच्या खात्यावर जमा न केल्यास सत्ताधारी नेत्यांना घेराव घालण्याचा इशारा दिला आहे.
महायुती सरकारने धान उत्पादक शेतकऱ्यांना हेक्टरी २० हजार रुपये बोनस दोन हेक्टरपर्यंत देण्याची घोषणा गेल्या वर्षी नागपूर येथील हिवाळी अधिवेशनात केली होती. मात्र, सहा महिन्यांनंतर काही शेतकऱ्यांच्या खात्यावर बोनसची रक्कम जमा केली. तर जिल्ह्यातील ७० हजारावर शेतकरी अद्यापही बोनसच्या प्रतीक्षेत आहेत.
सध्या खरीप हंगाम सुरू झाला असून, बोनसची रक्कम जमा न झाल्याने शेतकरी अडचणीत आले आहेत. शासनाने सर्व नोंदणीकृत शेतकऱ्यांच्या बँक खात्यावर बोनसची रक्कम जमा करण्याची घोषणा केली होती. पण सद्यःस्थितीत शासकीय धान खरेदी केंद्रावर धानाची विक्री करणाऱ्या शेतकऱ्यांच्या खात्यावर बोनसची रक्कम जमा करण्यात आली. तर नोंदणीकृत शेतकरी अद्यापही बोनसच्या प्रतीक्षेत आहेत. त्यामुळे शासनाने तीन दिवसांच्या आत शेतकऱ्यांच्या खात्यावर बोनसची रक्कम जमा करावी, अन्यथा याविरोधात तीव्र आंदोलन छेडण्याचा इशारा गोंदिया जिल्हा किसान सभेने दिला आहे