गोरेगाव : जिल्ह्यात गेले तीन दिवस झालेल्या अवकाळी पावसामुळे तसेच मावा तुडतुड्याच्या प्रादुर्भावामुळे अनेक भागांमध्ये धान पिकाचे मोठ्या प्रमाणावर नुकसान झाले आहे. शेतकऱ्यांना यंदा चांगल्या उत्पन्नाची
अपेक्षा असतानाच अवकाळी पावसाने निराशा केली आहे. या पार्श्वभूमीवर जिल्हा परिषदेचे अर्थ व बांधकाम सभापती डॉ. लक्ष्मण भगत यांनी सोमवारी (दि.२७) प्रत्यक्ष बांधावर जाऊन नुकसानीची पाहणी केली. तसेच शेतकऱ्यांची भेट घेऊन त्यांच्या अडचणी जाणून घेतल्या. डॉ. भगत यांनी प्रशासनाला नुकसानीचे पंचनामे तातडीने करून शेतकऱ्यांना मदत देण्याचे निर्देश दिले. तसेच शासनाकडे आपत्तीग्रस्त शेतकऱ्यांसाठी विशेष आर्थिक मदतीची मागणी करण्यात येईल, असेही त्यांनी सांगितले. शेतकऱ्यांनी यावेळी धान पिकावर झालेल्या मावा तुडतुड्याच्या प्रादुर्भावामुळे झालेल्या नुकसानीबाबत आपली व्यथा व्यक्त केली. अनेक शेतकऱ्यांचे पीक पूर्णपणे जमिनीवर पडले असून उत्पादनात मोठी घट होण्याची शक्यता वर्तवली जात आहे.
