👣 ‘पहिले पाऊल’ उपक्रमाचे विशेष कौतुक; विद्यार्थ्यांना मोफत पाठ्यपुस्तके व गणवेशाचे वाटप
आमगाव,दि.३०ः नव्या शैक्षणिक सत्राचा पहिला दिवस म्हणजे विद्यार्थ्यांसाठी उत्साहाचा आणि आनंदाचा सण. याच शुभमुहूर्तावर आणि प्रवेशोत्सवाच्या निमित्ताने जिल्हा परिषद प्राथमिक शाळा, बाम्हणी येथे सन्माननीय जिल्हा आरोग्य अधिकारी (DHO) डॉ. अभिजीत गोल्हार यांनी सदिच्छा भेट दिली. शाळेतील विद्यार्थ्यांचा उत्साह, शिक्षकांचे नियोजन आणि नाविन्यपूर्ण उपक्रम पाहून त्यांनी संपूर्ण शाळा व्यवस्थापनाचे तोंडभरून कौतुक केले.
शाळेत प्रवेश करणाऱ्या इयत्ता पहिलीतील चिमुकल्यांचे स्वागत करण्यासाठी शाळेने ‘पहिले पाऊल’ हा अत्यंत अभिनव आणि भावनिक उपक्रम राबवला. या उपक्रमांतर्गत पहिल्या दिवशी शाळेत पाऊल ठेवणाऱ्या बालकांच्या पायाचे ठसे रंगवून ते कागदावर उमटवण्यात आले आणि ते सुंदर स्मृतीचिन्ह म्हणून पालकांकडे सुपूर्द करण्यात आले.
या उपक्रमाचे कौतुक करताना डॉ. अभिजीत गोल्हार म्हणाले,”हा उपक्रम केवळ एक कृती नसून बालक, पालक आणि शाळा यांच्यात आयुष्यभराचे अतूट नाते आणि आत्मीयता निर्माण करणारा एक कौतुकास्पद सोहळा आहे.डॉ. गोल्हार यांनी शाळेतील विद्यार्थ्यांशी अत्यंत आपुलकीने संवाद साधला. त्यांच्या हस्ते पहिल्याच दिवशी विद्यार्थ्यांना मोफत पाठ्यपुस्तके आणि नवीन गणवेशाचे वाटप करण्यात आले. नवीन पुस्तके आणि गणवेश हातात पडताच विद्यार्थ्यांच्या चेहऱ्यावर एक वेगळाच आनंद ओसंडून वाहत होता.
शाळेचा अत्यंत स्वच्छ आणि सुंदर परिसर, पहिल्याच दिवशीची विद्यार्थ्यांची १००% उपस्थिती (पटनोंदणी) आणि शिक्षकांनी घेतलेले परिश्रम पाहून जिल्हा आरोग्य अधिकाऱ्यांनी समाधान व्यक्त केले. ग्रामीण भागातील शिक्षकांचे हे १००% पटनोंदणीसाठीचे प्रयत्न कौतुकास्पद असून, यामुळे जिल्हा परिषद शाळांचा दर्जा अधिक उंचावत असल्याचे त्यांनी नमूद केले. त्यांनी संपूर्ण शिक्षक वृंद व शाळा व्यवस्थापन समितीला पुढील वाटचालीस भरभरून शुभेच्छा दिल्या.
या सोहळ्याप्रसंगी गावाचे प्रथम नागरिक तथा सरपंच सुभाष प्रेमलाल थेर, शाळा व्यवस्थापन समितीचे अध्यक्ष/व्यवस्थापक राजेंद्र चुन्नीलाल पुन्ने, शाळेचे मुख्याध्यापक मुनेश्वर जेतवार, शिक्षिका श्रीमती पुष्पा गौतम यांच्यासह गावातील प्रतिष्ठित नागरिक, तरुण मंडळी आणि मोठ्या संख्येने पालक उपस्थित होते.प्रवेशोत्सवाच्या या यशस्वी आणि उत्साहपूर्ण वातावरणामुळे बाम्हणी गावात आणि शिक्षण क्षेत्रात शाळेचे विशेष कौतुक होत आहे.
