गशिअचा कारभार प्रभारीच्या खांद्यावर
देवरी,दि.20 – प्रशासन गतिमान आणि पारदर्शक करण्यासाठी कर्मचाऱ्यांची पदे रिक्त असताना बदली करण्यात आलेल्या कर्मचाऱ्यांना कार्यमुक्त करण्याची जिल्हा परिषद प्रशासनाकडून सक्ती करण्यात येत असल्याची माहिती पुढे आली आहे. आधीच कर्मचाऱ्यांचा वानवा असताना आणखी कर्मचारी संख्या कमी करण्यात आली, तर देवरी सारख्या दुर्गम आणि मागास तालुक्याचा विकास कसा करणार?, असा प्रश्न स्थानिक नागरिकांनी शासन-प्रशासनाला केला आहे. उल्लेखनीय म्हणजे येथील गटशिक्षणाधिकारी यांचा कार्यभार प्रभारीच्या खांद्यावर देऊन शिक्षणाचा गाडा हाकला जात आहे, हे महत्त्वाचे.
सविस्तर असे की, देवरी तालुका हा आदिवासी बहुल,नक्षलग्रस्त आणि मागास अशी ओळख असलेला तालुका आहे. या तालुक्याचा विकास स्थानिक संस्थांकडून अपेक्षित आहे. यासाठी तालुकास्तरावर असलेल्या पंचायत समितीच्या कार्यालयामध्ये 46 कर्मचाऱ्यांचा आकृतिबंध मंजूर करण्यात आला आहे. सन 2019च्या प्रशासकीय आणि विनंती बदलीपूर्वी केवळ37 कर्मचाऱ्यांच्या भरवशावर येथील कामकाज सुरू होते. मात्र, मे 2019च्या बदली प्रकरणानंतर या पंचायत समितीतून एकूण 5 कर्मचाऱ्यांची बदली करण्यात आली. याउलट, येथे केवळ 4 कर्मचारी बदलीने पाठविण्यात आले. यापैकी एक कर्मचारी अद्याप येथे रुजू होणे बाकी आहे. देवरी येथून स्थानांतरीत झालेल्या 5कर्मचाऱ्यांपैकी एका कर्मचाऱ्याला मुक्त करण्यात आले. उर्वरित कर्मचाऱ्यांना कार्यरत कर्मचाऱ्यांची संख्या कमी असल्याने कार्यमुक्त करण्यात आले नाही. असे असताना जिप प्रशासनाने पंसला संबंधित कर्मचाऱ्यांना कार्यमुक्त करण्याची ताकीद गेल्या ऑगस्ट महिन्यात दिल्याची माहिती आहे. जर या कर्मचाऱ्यांना कार्यमुक्त करण्यात आले तर येथे पुन्हा 6 कर्मचाऱ्यांचे पद रिक्त राहतील. याचा परिणाम, तालुक्याच्या विकासावर पडणार, हे विसरून चालणार नाही. तरी या मागास तालुक्याच्या विकासाला गती देण्यासाठी या कार्यालयातील रिक्तपदे भरण्याची मागणी पुढे आली आहे.
