चंद्रपूर,दि.15 : राष्ट्रीयच नव्हे, आंतरराष्ट्रीय स्तरावर प्रख्यात असणाऱ्या ताडोबा-अंधारी व्याघ्र प्रकल्पात लॉकडाऊन काळात माया व छोटी तारा या दोन वाघिणींनी ८ बछड्यांना जन्म दिला असल्याची बातमी ताजी असताना दुसरीकडे ताडोबा-अंधारी व्याघ्र प्रकल्पातील बफर झोन मधील मोहर्ली वनपरीक्षेत्रात दोन वाघाचे बछडे दोन माकडांसह कुजलेल्या अवस्थेत मृतावस्थेत आढळले. यामुळे खळबळ उडाली आहे. सदर घटना रविवारी दुपारी उघडकीस आली. सदर वन्यजीवांचा मृत्यू हा विषबाधेने झाल्याचा प्राथमिक अंदाज व्यक्त करण्यात येत आहे.लॉकडाऊन काळात ताडोबातील सर्वाधिक लोकप्रिय वाघीण माया (टी-१२) हिने पाच बछड्यांना जन्म दिला आहे, तर दुसरीकडे छोटी तारा (टी-७) या प्रख्यात असणाऱ्या वाघिणीने कोलारा वनपरीक्षेत्रातील जामणी भागात ३ बछड्यांना जन्म दिला आहे. मार्च महिन्यात एकूण ८ बछडे जन्माला आले असून त्यांची विशेष काळजी घेतली जात आहे. सदर गोड वार्ता सर्वत्र असताना दुसरीकडे ताडोबा अंधारी व्याघ्र प्रकल्प क्षेत्रातील मोहर्ली वनपरीक्षेत्राच्या सीतारामपेठ नियतक्षेत्रामध्ये गस्त घालताना वाघाचे दोन बछडे मृतावस्थेत आढळले. त्याच ठिकाणी शेजारी दोन माकडाची पिल्लेही कुजलेल्या अवस्थेत आढळल्याने खळबळ उडाली आहे.वाघाचे बछडे व माकडाची पिल्ले येथील कोंडेगाव तलावाजवळ आढळले असून यामागचे कारण अद्याप कळू शकलेले नाही. विषबाधेतून हा प्रकार घडल्याचा प्राथमिक अंदाज व्यक्त करण्यात आला असून याप्रकरणी तातडीन तपास सुरू करण्यात आला आहे.
