गोंदिया,दि.22 जानेवारी: राज्य शैक्षणिक संशोधन आणि प्रशिक्षण परिषद महाराष्ट्र, पुणे (SCERTM) आणि भारतीय विज्ञान शिक्षण व संशोधन संस्था, पुणे (IISER Pune) यांच्या संयुक्त विद्यमाने, जिल्हा शिक्षण व प्रशिक्षण संस्था (DIET), गोंदिया येथे तीन दिवसीय दि. 20 ते 22 जानेवारी दरम्यान विज्ञान आणि गणित कॅस्केड कार्यशाळा यशस्वीरीत्या पार पडली.
ही कार्यशाळा IRISE (Innovation in Research and STEM Education) उपक्रमांतर्गत आयोजित करण्यात आली होती. या उपक्रमाचा मुख्य उद्देश STEM (विज्ञान, तंत्रज्ञान, अभियांत्रिकी आणि गणित) शिक्षणामध्ये शिक्षकांना नवोपक्रम, शैक्षणिक आशय, आणि मूल्यमापन साधनांवर प्रशिक्षण देणे हा आहे.
कार्यशाळेत गोंदिया जिल्ह्यातील 60 गणित आणि विज्ञान शिक्षकांनी सक्रिय सहभाग नोंदवला. या कार्यशाळेमुळे सहभागी शिक्षकांना विद्यार्थ्यांमध्ये सर्जनशीलता, समस्यांचे नाविन्यपूर्ण समाधान, आणि STEM शिक्षणाचे महत्त्व अधोरेखित करण्यासाठी नवीन पद्धतींचा अवलंब करण्याची प्रेरणा मिळाली.
कार्यशाळेचे सत्र आय सी असीम बॅनर्जी, संजय कटरे, मनोज पंधरे आणि IRISE टीम पुणेचे पंकज यादव यांच्या मार्गदर्शनाखाली आयोजित करण्यात आले. त्यांनी विविध सत्रांद्वारे , 7 इनोव्हेशन मॉडेल्स, शिक्षण पद्धती, आणि सत्रांच्या संकल्पनांवर सखोल असे मार्गदर्शन केले.
कार्यक्रमाचे आयोजन विज्ञान व तंत्रज्ञान मंत्रालय, भारत सरकार; आयसर पुणे; ब्रिटिश कौन्सिल; रॉयल सोसायटी ऑफ केमिस्ट्री; आणि टाटा टेक्नॉलॉजीज यांच्या सहकार्याने करण्यात आले होते.
कार्यशाळेचे यशस्वी आयोजन डाएट गोंदियाचे प्राचार्य डॉ. नरेश वैद्य, अधिव्याख्याता डॉ. भाऊराव राठोड यांच्या नियंत्रणात झाले. कार्यक्रमाचे संचालन व व्यवस्थापनकरिता विषय साधनव्यक्ती वशिष्ठ खोब्रागडे व मंगला बडवाईक यांनी सहकार्य केले. कार्यक्रमाच्या समारोप सत्रात सहभागी सर्व शिक्षकांना व सुलभकांना प्रमाणपत्रे प्रदान करण्यात आली.