सर्वोच्च न्यायालयाचा निकाल
नवीदिल्ली (वृत्तसंस्था)- हुंडाविरोधी कायद्या अंतर्गत पत्नीने आपल्या पतीविरुद्ध खोटी तक्रार दिल्यास आता चांगलेच महागात पडणार आहे. सर्वोच्च न्यायालयाने सोमवारी दिलेल्या एका निकालात म्हटले की, पत्नीने तिच्या पती आणि सासरच्या मंडळींविरोधात हुंड्या मागितल्याची खोटी तक्रार केली असल्यास त्या पतीला पत्नीशी घटस्फोट घेण्याचा अधिकार आहे.
हैद्राबादमध्ये येथील के. श्रीनिवास आणि के. सुनीता यांच्यात सुरु असलेल्या खटल्यात सर्वोच्च न्यायालयाने हे मत मांडले. १९९५ मध्ये पत्नीने घर सोडल्यानंतर श्रीनिवास यांनी स्थानिक न्यायालयात घटस्फोटासाठी याचिका दाखल केली होती. मात्र यानंतर त्यांची पत्नी सुनीता यांनी श्रीनिवास व त्यांच्या कुटुंबातील अन्य सात सदस्यांविरोधात हुंडाविरोधी कायदा व अन्य कलमांतर्गत गुन्हा दाखल केला. यामुळे श्रीनिवास व त्यांच्या कुटुंबीयांना काही महिने तुरुंगाची हवाही खावी लागली. कौटुंबिक न्यायालय आणि उच्च न्यायालयानंतर हे प्रकरण सर्वोच्च न्यायालयात पोहोचले. या प्रकरणावर निकाल देत श्रीनिवास यांना घटस्फोट घेण्यास सर्वोच्च न्यायालयाने मंजुरी दिली आहे. महिलेने क्रूरनितीने विचार करुनच खोटी तक्रार दाखल केली होती. पती व त्यांच्या कुटुंबाची नाचक्की व्हावी आणि त्यांना शिक्षा मिळावी हाच या तक्रारीमागचा उद्देश होता, असे न्या. विक्रमजीत सेन आणि पी.सी. पंत यांच्या खंडपीठाने स्पष्ट केले.
