गोंदिया,दि.17-गोंदिया विधानसभा मतदारसंघातील प्रत्येक गावात सिमेंट रस्त्याचे काम सुरू आहे. याशिवाय एक गाव दुसऱ्या गावाला जोडण्यासाठी आणि त्या गावांचे रस्ते राष्ट्रीय महामार्गाला जोडण्यासाठी रुंद डांबरी रस्ते तयार करण्यात येत आहेत.या अंतर्गत सुरु असलेल्या कामांची पाहणी करण्यासाठी आमदार विनोद अग्रवाल यांनी स्वत: इर्री ते अंभोरा गावापर्यंत 15 कोटी रुपये खर्चून सुरू असलेल्या डांबरी रस्त्याच्या कामाची पाहणी केली.
त्यांनी कामाची पाहणी करीत संबंधित ठेकेदाराशी बोलून कामाला गती देण्याच्या सूचना दिल्या. हा जिल्हा रस्ता महामार्ग स्तरावर साडेपाच मीटर रुंद करण्यात येत असल्याचे त्यांनी सांगितले. आमदार विनोद अग्रवाल म्हणाले, विधानसभा मतदारसंघातील रस्त्यांची दुरवस्था हा गंभीर प्रश्न आहे. बहुतांश रस्ते अरुंद आणि जीर्ण अवस्थेत होते.बदलत्या वातावरणात प्रत्येक गाव प्रगतीच्या मार्गावर आहे. वाहनांची संख्या वाढली आहे. मात्र रस्ते सुस्थितीत नसतील तर मोठ्या समस्यांना सामोरे जावे लागत होते.मात्र आता आम्ही प्रत्येक रस्त्याचे रुंदीकरण आणि सुधारणा करण्यासाठी ब्ल्यू प्रिंट तयार केली आहे. कोट्यवधी रुपयांचे रस्ते मंजूर झाले असून, कामाला सुरुवात लागली आहे. अनेक ठिकाणी कामे सुरू झाली आहेत. गावातील रस्ते राष्ट्रीय महामार्गाला जोडले जात आहेत.
