ग्रामीण महिलांसाठी सक्षमीकरणाचा नवा अध्याय: “पलाश मिनी सरस प्रदर्शन – 2025”

0
76

गोंदिया, 25 जानेवारी 2025: महाराष्ट्र राज्य ग्रामीण जीवनोन्नती अभियान (उमेद) यांच्या वतीने 22 ते 26 जानेवारी दरम्यान गोंदिया येथे “पलाश मिनी सरस प्रदर्शन – 2025” आयोजित करण्यात आले आहे. सुभाष ग्राउंड, गुरुनानक शाळेजवळ भव्य स्वरूपात साकारलेले हे प्रदर्शन ग्रामीण महिलांच्या विकासासाठी महत्त्वपूर्ण ठरत आहे. जिल्हाधिकारी प्रजित नायर यांनी या प्रदर्शनाला भेट देऊन महिलांच्या कर्तृत्वाला सलाम केला.

ग्रामीण संस्कृतीला नवे व्यासपीठ:
उमेद अभियानाच्या माध्यमातून ग्रामीण भागातील महिलांना स्वयंसहाय्यता गटांद्वारे एकत्र करून त्यांना व्यवसायात सक्षमता मिळवून देणे हा मुख्य उद्देश आहे. या प्रदर्शनाद्वारे महिलांना त्यांच्या उत्पादनांसाठी शहरी बाजारपेठ उपलब्ध करून दिली जाते, ज्यामुळे आर्थिक विकासाची नवी दिशा उघडली जाते.
प्रदर्शनात सुमारे 100 स्टॉल्स उभारण्यात आले आहेत, त्यापैकी 80 स्टॉल गोंदिया जिल्ह्यातील असून उर्वरित 20 स्टॉल्स इतर जिल्ह्यांतील आहेत. येथे विविध प्रकारची उत्पादने, जसे की हस्तकला वस्त्र, वुडन क्राफ्ट, बंजारा आर्ट, वारली आर्ट, सेंद्रिय अन्नपदार्थ, व पारंपरिक गहू व भरडधान्य उत्पादने उपलब्ध आहेत.
ग्रामीण महिलांनी बनवलेले खमंग व चविष्ट पदार्थ फूड कोर्टमध्ये चाखायला मिळत आहेत. शाकाहारी आणि मांसाहारी पदार्थांसाठीच्या स्टॉल्सना नागरिकांचा मोठा प्रतिसाद मिळत आहे. कुटुंबासोबत आलेल्या मुलांसाठी विशेष प्ले एरिया देखील उभारण्यात आला आहे, ज्यामुळे प्रदर्शनाचा आनंद सर्व वयोगटातील लोकांना घेता येत आहे.
2023 हे आंतरराष्ट्रीय भरडधान्य वर्ष घोषित करण्यात आले होते, त्यानुसार या प्रदर्शनात मिलेट दालनाचा समावेश करण्यात आला आहे. येथे सेंद्रिय व पोषणमूल्यांनी भरलेले पदार्थ शहरी नागरिकांसाठी उपलब्ध करून देण्यात आले आहेत.
उमेद अभियानाच्या वतीने महिलांना विविध कौशल्य प्रशिक्षण दिले जाते. यामुळे ग्रामीण महिला स्वतःचे व्यवसाय सुरू करत आहेत. LED लाईट निर्मिती, स्वयंपाकासाठी उपयुक्त साहित्यनिर्मिती, सेंद्रिय खते व इतर अनेक उत्पादने या महिलांनी साकारली आहेत
प्रदर्शनाला शहरातील नागरिकांनी भरघोस प्रतिसाद दिला आहे. वस्त्रे, खाद्यपदार्थ, हस्तकला आणि दैनंदिन उपयोगाच्या वस्तू खरेदीसाठी लोकांनी मोठी गर्दी केली आहे.
पलाश मिनी सरस प्रदर्शन ग्रामीण महिलांना शहरी ग्राहकांपर्यंत पोहोचविणारे एक महत्त्वपूर्ण व्यासपीठ ठरले आहे. अशा प्रदर्शनांद्वारे महिलांना त्यांच्यातील कौशल्याची जाणीव होत आहे, तसेच त्यांच्या उत्पादनांना बाजारपेठ मिळत आहे.
ग्रामीण भागातील महिलांना उद्योगक्षम बनविण्यासाठी उमेद अभियानाने मोठा प्रयत्न केला आहे. त्यांना बाजारपेठेत नव्या संधी मिळवून देण्यासाठी अशा उपक्रमांची भूमिका महत्त्वाची ठरते.
पलाश मिनी सरस प्रदर्शन हे केवळ विक्रीसाठीचे व्यासपीठ नसून ग्रामीण महिलांना स्वावलंबी बनविण्याचा एक व्यापक उपक्रम आहे. गोंदिया जिल्ह्याच्या नागरिकांनी या उपक्रमाचा लाभ घ्यावा व महिलांच्या प्रगतीत आपले योगदान द्यावे, असे आवाहन आयोजकांनी केले आहे.