मागासवर्गीय विद्युत कर्मचारी संघटनेचे गडचिरोलीत राज्यव्यापी अधिवेशन

0
18

गडचिरोली: महाराष्ट्र राज्य मागासवर्गीय विद्युत कर्मचारी संघटनेचे २३ वे राज्यव्यापी द्विवार्षिक अधिवेशन गडचिरोली येथील आर.के.सेलिब्रेशन हॉल येथे ८ व ९ फेब्रुवारी रोजी होणार असल्याची माहिती महावितरणचे निवृत्त उपकार्यकारी अभियंता तथा संघटनेचे कायदेशिर सल्लागार नरेंद्र जारोंडे यांनी आज पत्रकार परिषदेत दिली.
श्री.जारोंडे यांनी सांगितले की, ८ फेब्रुवारीला सकाळी ११ वाजता स्वतंत्र मजदूर युनियन या देशव्यापी कामगार संघटनेचे राष्ट्रीय अध्यक्ष जे.एस.पाटील यांच्या अधिवेशनाचे उद्घाटन होईल. संघटनेचे केंद्रीय अध्यक्ष डॉ.संजय घोडके हे अध्यक्षस्थानी राहतील. महापारेषण कंपनीचे संचालक (संचलन) सतीश चव्हाण, संचालक (मानव संसाधन) सुगत गमरे, महानिर्मितीचे कार्यकारी संचालक (मानव संसाधन) डॉ.नितीन वाघ,स्वतंत्र मजदूर युनियनचे राष्ट्रीय महासचिव ए.व्ही.किरण,राष्ट्रीय उपाध्यक्ष डॉ.के.पी.स्वामीनाथन हे प्रमुख पाहुणे म्हणून उपस्थित राहतील.
या अधिवेशनात वीज कंपन्यांचे प्रस्तावित खाजगीकरण, वाढते कंत्राटीकरण व स्मार्ट मीटरचा विरोध,कंत्राटी कर्मचाऱ्यांना कायम सेवेत सामावून घेणे या महत्त्वपूर्ण प्रश्नांवर संघटनेच्या आगामी लढ्याची दिशा ठरविण्यात येईल.
उद्घाटनानंतर दैनिक ‘सकाळ’चे निवृत्त संपादक तथा प्रसिद्ध लेखक व विचारवंत उत्तम कांबळे हे ‘कामगार चळवळ:काल,आज आणि उद्या’ या विषयावर मार्गदर्शन करतील. अधिवेशनाच्या दुसऱ्या सत्रात इतिहास संशोधक व लेखक डॉ.श्रीमंत कोकाटे हे ‘समतावादी चळवळीचा इतिहास आणि कष्टकरी समाजाच्या प्रेरणा’ या विषयावर, तसेच सामाजिक विचारवंत व कवी प्रभू राजगडकर हे ‘दलित,आदिवासी समाजाचे प्रश्न व आगामी लढ्याची दिशा’ या विषयावर मार्गदर्शन करतील. अध्यक्षस्थानी स्वतंत्र मजदूर युनियनचे राष्ट्रीय अध्यक्ष जे.एस.पाटील हे राहतील.
दुसऱ्या दिवशी ९ फेब्रुवारीला कार्यकर्ता प्रबोधन सत्रात दैनिक लोकमतच्या पुणे आवृत्तीचे संपादक, ज्येष्ठ पत्रकार संजय आवटे हे ‘देश घडविणाऱ्या महापुरुषांची विचारधारा व आम्ही भारताचे लोक’ या विषयावर मार्गदर्शन करतील. अध्यक्षस्थानी संघटनेचे सरचिटणीस प्रेमानंद मौर्य हे राहतील.
दुसऱ्या सत्रात संघटनेच्या कार्याचा आढावा घेऊन पुढील वाटचालीबाबत संकल्प करण्यात येईल. डॉ.संजय घोडके यांच्या अध्यक्षतेखाली होणाऱ्या या सत्रात प्रमुख मार्गदर्शक म्हणून जे.एस.पाटील हे मार्गदर्शन करतील. तसेच कार्याध्यक्ष संजय मोरे, सरचिटणीस प्रेमानंद मौर्य, मुख्य संघटक सूर्यकांत जनबंधू, विधी सल्लागार एन.बी.जारोंडे, सल्लागार एस.के.हनवते व राजू गायकवाड आपले विचार व्यक्त करतील. या अधिवेशनात राज्यभरातील २ हजार कर्मचारी उपस्थित राहणार असल्याचे नरेंद्र जारोंडे यांनी सांगितले.
पत्रकार परिषदेला संघटनेचे झोन अध्यक्ष चंद्रकांत सेडमेक, झोन सचिव कुणाल पाटील, दयानंद हाडके, गौतम रामटेके, विनय मोटघरे, अनिल झाडे, नरेंद्र डोंगरे, जे.पी.मेश्राम, सुधीर चौधरी,मिथून शेंडे, एल.आय थाटकर, रवींद्र वाकडे, जे.सी.रामटेके,विजय दिवटे,योगेश सलामे,विजय संसारे उपस्थित होते.