गडचिरोली, दि.२५: गडचिरोली जिल्हा परिषदेंतर्गत २०१३ मध्ये झालेल्या २२० शिक्षकांच्या नियमबाह्य बदल्यांप्रकरणी गडचिरोली पोलिसांनी अटक केलेले जिल्हा परिषदेच्या शिक्षण विभागातील लिपिक विजेंद्र सिंग व नचिकेत शिवणकर यांना न्यायालयाने १० दिवसांची पोलिस कोठडी सुनावली आहे.
शिक्षकांच्या बोगस बदल्यांप्रकरणी पोलिसांनी काल विजेंद्र उर्फ विजय सिंग व नचिकेत शिवणकर यांना अनुक्रमे शेगाव व मुल येथून अटक केली. आज दुपारी त्यांना न्यायालयात हजर करण्यात आले असता न्यायालयाने त्यांना ४ ऑक्टोबरपर्यंत पोलिस कोठडी सुनावली. तब्बल १० दिवसांची पोलिस कोठडी असल्याने पोलिसांना आरोपींकडून बरीच माहिती मिळण्याची शक्यता आहे. बोगस बदली प्रकरणात ७३ शिक्षकांच्या नस्ती गायब आहेत. शिवाय अनेक जणांचे बदली आदेशच बोगस आहेत. तत्कालिन मुख्य कार्यपालन अधिकाऱ्यांच्या बनावट सह्या करणे, अनेक आदेशांवर जिल्हा परिषद सदस्यांनी शिफारस केल्याचा उल्लेख करणे, आदेशावर जावक क्रमांक नसणे असे अनेक प्रकार त्यावेळी करण्यात आले.
